EAEO-ǵa múshe memlekettermen shekarada elge taýarlar ákelý monitoringi kúsheidi. Bul týraly Májilisiniń jalpy otyrysynda QR Úkimetiniń 2019 jylǵy respýblikalyq biýdjettiń atqarylýy týraly esebin qaraý kezinde Qarjy ministri Erulan Jamaýbaev málim etti, dep habarlaidy QazAqparat.
«Kirister boiynsha jospar transfertterdi esepke almaǵanda 100,6 paiyzǵa oryndaldy. 2019 jylǵy 1 qańtardan bastap elektrondyq túrdegi shot-faktýralardy mindetti túrde jazyp berý elimizde óndiriletin taýarlarǵa salynatyn qosylǵan qun salyǵy boiynsha túsimderdiń 1,5 esege ósýin qamtamasyz etti. Óz kezeginde korporativtik tabys salyǵy boiynsha túsimder 17 paiyzǵa ósti. Eýraziialyq ekonomikalyq odaqqa múshe memlekettermen shekarada elge taýarlar ákelý monitoringi kúsheidi», - dedi ministr.
Onyń sózine qaraǵanda, jalpy alǵanda ákimshilendirý sharalaryn kúsheitý men tsifrlandyrý esebinen 900 mlrd teńgeden astam túsimder qamtamasyz etildi.
«Esepti qaraý kezinde kiris bóliginiń atqarylýy jóninde eskertýler aityldy. Birinshiden, zańdy tulǵalardan alynatyn korporativtik tabys salyǵy úlesiniń tómendeýine qatysty. Korporativtik tabys salyǵy túsimderiniń joǵary qarqynyna qaramastan, onyń úlesiniń tómendeýi, negizinen qosylǵan qun salyǵy úlesiniń 11 paiyzdyq tarmaqqa artýymen túsindiriledi. Ekinshiden, tólemderdi avanstaý esebinen respýblikalyq biýdjettiń kiris bóliginiń atqarylýy týraly eskertýge qatysty. Bul másele ádisnamalyq sipatqa ie, sondai-aq Ekonomikalyq yntymaqtastyq jáne damý uiymy elderin (AQSh, Frantsiia, Liýksembýrg) qosa alǵanda, halyqaralyq praktikaǵa sáikes keletin tájiribe. Avanstyq tólem mehanizmi biznes sýbektileriniń ózderine de qolaily», - dedi E. Jamaýbaev.
Úshinshiden, 2019 jyly Jalpy ishki ónimge shaqqandaǵy shoǵyrlandyrylǵan biýdjet salyq túsimderiniń tómendegeni atap ótildi.
Bul jaǵdaiǵa munaidyń álemdik baǵasynyń 10 paiyzǵa arzandaýy tikelei sebep boldy.
«Salyqtyq jeńildikter men preferentsiialar máselesine qatysty Úkimet olardy ońtailandyrý úshin tiisti jumys júrgizip jatqanyn atap ótkim keledi», - dedi vedomstvo basshysy.
