Parlament Senatynyń jalpy otyrysynda «2014 jylǵy 12 qarashadaǵy Eýraziialyq ekonomikalyq komissiianyń básekelestiktiń biryńǵai qaǵidalarynyń saqtalýyn baqylaý jónindegi ókilettikterdi júzege asyrýy kezinde qupiia aqparatty qorǵaý tártibi jáne ony jariia etkeni úshin jaýaptylyq týraly kelisimge Armeniianyń qosylýy týraly hattamany ratifikatsiialaý týraly» Zańy qabyldandy, dep habarlaidy QazAqparat.
«Eýraziialyq ekonomikalyq odaqtyń qurylǵanyna 5 jyl boldy. Osy kezeńde Eýraziialyq ekonomikalyq odaqqa Armeniia Respýblikasy men Qyrǵyz Respýblikasy qosyldy. Eýraziialyq ekonomikalyq komissiia básekelestiktiń jalpy qaǵidalarynyń saqtalýyna, onyń ishinde, eger bul básekelestikke teris yqpal etetin bolsa, transshekaralyq naryqtardaǵy talaptar buzýshylyqtarynyń jolyn kesý boiynsha baqylaýdy júzege asyrady. Eýraziialyq ekonomikalyq komissiia transshekaralyq naryqtardaǵy básekelestiktiń jalpy qaǵidalarynyń buzylýy týraly ótinishterdi qaraý, tergeý júrgizý jáne isterdi qarastyrý kezinde, qupiia aqparatty qorǵaý tártibi jáne ony jariia etkeni úshin jaýapkershilik týraly qupiia aqparat Kelisim normalarymen qorǵalady», - dep túsindirdi Básekelestikti qorǵaý jáne damytý agenttiginiń tóraǵasy Serik Jumanǵarin.
Bul kelisimge 2014 jyly 12 qarashada Qazaqstan Respýblikasy, Resei Federatsiiasy jáne Belarýs Respýblikasymen birlesip qol qoiǵan.
Ratifikatsiialanatyn hattamaǵa sáikes Armeniia Respýblikasy kelisimge qosylady.
«Armeniianyń osy kelisimge qosylýy onyń Eýraziialyq ekonomikalyq odaqqa múshe memleketterdiń sýbektilerine qatysty transshekaralyq naryqtardaǵy básekelestiktiń jalpy qaǵidalarynyń saqtalýyn baqylaý jónindegi Eýraziialyq ekonomikalyq komissiianyń ókilettigin iske asyrýǵa tolyq quqyqty qatysýyn qamtamasyz etýge múmkindik beredi», - dedi agenttik basshysy.
