Eýraziialyq ekonomikalyq odaq aiasyndaǵy ózara saýdada teńgeniń úlesi qandai? Bul suraqqa OKQ-da ótken baspasóz máslihatynda QR Saýda jáne integratsiia vitse-ministri Janel Kúshikova jaýap berdi, dep habarlaidy QazAqparat.
«EAEO aiasynda kásipkerler ózara esep aiyrysar kezde qandai valiýtany tańdaýy kerektigi jóninde shekteý nemese arnaiy retteý formasy joq. Qandai valiýtada esep aiyrysý jón ekenin kásipkerdiń ózderi sheshedi», - dedi Janel Kúshikova OKQ-da ótken baspasóz máslihatynda.
Onyń aitýynsha teńgemen saýda jasaityn kásipkerlerdiń sany óte az.
«Álbette Resei Federatsiiasymen saýda qarym-qatynasy baiaǵydan kele jatyr. Eki el arasyndaǵy taýar ainalymynyń kólemi óte úlken. Kásipkerler kóbinese ulttyq valiýtada esep aiyrysqandy jón kóredi. EAEO aiasynda esep aiyrysýdyń shamamen 76-77 paiyzdyq mólsheri ulttyq valiýtamen júrgiziledi. Resei Federatsiiasy degen aýqymdy naryq ekenin eskersek, bul esep aiyrysýdyń orasan zor úlesi reseilik rýblge tiesili ekenin túsinemiz. Al teńgeniń úlesi bul turǵyda shamamen 1,5 paiyzdy quraidy», - dedi ol.
