Qazaqstandyqtar Eldos Smetov pen Ǵusman Qyrǵyzbaev dziýdodan Tsindaoda (Qytai) ótip jatqan «Masters» týrnirinde júldesiz qaldy, dep habarlaidy "Ult aqparat".
E.Smetov pen Ǵ.Qyrǵyzbaev 60 kelige deiingi salmaqta qola júlde úshin beldesti.
Eldos jartylai finalda ispaniialyq Frantsisko Garrigostan utylyp qaldy. Sodan keiin kishi finalda reseilik Robert Mshvidobadzege ese jiberdi.
Ǵusman shirek finalda otandasy E.Smetovke jol bergenimen, jubanysh beldesýinde ulybritaniialyq Eshli Makkenzidi tize búktirdi.
Sosyn qola júlde úshin básekede ózbekstandyq Sharafoddin Lýtfýllaevpen tatamige shyqty. Buǵan deiin qarsylastar úsh márte kezdesip, sonyń ekeýinde ózbekstandyq dziýdoshy utqan eken. Sonyń ishinde biyl Tokioda ótken álem chempionatynyń jartylai finalynda Sh.Lýtfýllaevtyń basym túskeni belgili.
Bul joly Ǵ.Qyrǵyzbaev úsh márte eskertý alyp, jeńis qarsylasyna berildi.
Osylaisha E.Smetov pen Ǵ.Qyrǵyzbaev besinshi oryndy qanaǵat tutty.
Bul salmaqta finalda F.Garrigosty taza jeńgen álemdik reitingte kósh bastap turǵan japoniialyq Riýdziý Nagaiama chempion atandy.
Tokiodaǵy álem chempionatynda E.Smetov jartylai finalda dál osy R.Nagaiamadan utylyp, qola júlde úshin básekede otandasy Ǵ.Qyrǵyzbaevty jeńgen bolatyn.
Áielder arasynda qazaqstandyq Otgontsetseg Galbadrah 48 kelige deiingi salmaqta jetinshi orynmen shekteldi.
Eske sala keteiik, budan buryn qazaqstandyq dziýdoshylardyń Qytaida ótetin týrnirge qatysatynyn jazǵan bolatynbyz.
