AQSh prezidenti Djo Baiden Resei basshysy Vladimir Pýtinmen telefon arqyly sóilesti. Aq úidiń habarlaýynsha, eki basshy aimaq jáne ǵalamdyq máseleler, onyń ishinde AQSh pen Reseidiń qarýlanýdy baqylaýǵa alý jáne qaýipsizdik salasy boiynsha strategiialyq turaqtylyqty qoldaý umtylysyn talqylaǵan. Qarýlanýdy qysqartý týraly kelisimniń merzimin uzartý máselesi de sóz bolǵan.
Prezident Baiden AQSh ulttyq múddesin qorǵaý maqsatynda kibershabýyl, sailaýǵa kiligý siiaqty Resei tarabynyń áreketterine naqty jaýap beretinin aiqyn ańǵartqan.
Prezident Baiden AQSh-tyń Ýkraina egemendigi men territoriialyq tutastyǵyn burynǵysha qoldai beretinin atap ótken. Ol anneksiialanǵan Qyrym men Ýkrainamen shekarada Resei áskeriniń kóbeiýine alańdaýshylyq bildirip, Máskeýdi jaǵdaidy ýshyqtyrmaýǵa shaqyrǵan.
Prezident Baiden AQSh múddesine sáikes, Reseimen turaqty ári josparly qarym-qatynas ornatqysy keletinin rastap, aldaǵy ailarda eki el arasyndaǵy iri máselelerdi talqylaý úshin úshinshi bir memlekette kezdesýdi usynǵan.
Vladimir Pýtin men Djo Baidenniń telefonmen áńgimeleskenin Kreml saity da habarlady. Onda áńgimeniń Amerika tarabynyń bastamasymen bolǵany jazylǵan. Kremldiń jazýynsha, ekeýara áńgimede Resei-Amerika qatynasynyń qazirgi ahýaly jáne halyqaralyq kún tártibindegi birqatar mańyzdy máseleler talqylanǵan.
Resei taraby eki jaqtyń da ǵalamdyq qaýipsizdikti qamtamasyz etý úshin negizgi baǵyttar boiynsha dialogty jalǵastyrýǵa daiyn ekenine nazar aýdarady. Máskeýdiń aitýynsha, bul tek Resei men AQSh múddesi ǵana emes, búkil halyqaralyq qaýymdastyq úshin mańyzdy másele.
Kreml habarlamasynda Ýkraina tóńiregindegi daǵdarys "ishki másele" dep sipattalǵan. Áńgime aýany "Ýkraina ishindegi daǵdarysqa" ulasqanda Vladimir Pýtin saiasi máseleni retteýdiń "minskilik" ádisi týraly baiandaǵan.
