AQSh prezidenti bolyp sailanǵan Djo Baiden men vitse-prezident Kamala Harris 20 qańtardaǵy inaýgýratsiiada ant qabyldap, qyzmetke kiristi.
9 qarashadaǵy sailaýda Baiden sailaýshylar alqasynyń 306 daýysyn, Donald Tramp 270 daýysyn alǵan. Keiin Tramp sailaý nátijesimen kelispeitinin aityp, sotqa shaǵym túsirgen. Degenmen sot onyń 50 aryzyn qanaǵattandyrmai tastady.
Baiden men Harris Vashingtondaǵy Kapitolii saraiynyń aldynda ótken saltanatty jiynda ant berdi. 78 jastaǵy Djo Baiden – AQSh tarihyndaǵy memleket basshysy qyzmetine kelgen eń qart adam. Al Kamala Harris – AQSh vitse-prezidenti qyzmetine kirisken alǵashqy áiel.
Bul joly prezidenttiń ulyqtaý rásimi koronavirýs pandemiiasyna bailanysty ádettegiden qarapaiym ótti. Kapitoliiden bastap Ulttyq saiabaq boiymen tizile turatyn júz myńdaǵan adamnyń ornyna AQSh shtattary men aýmaqtarynyń 200 myńnan astam Týy ilinip turdy.
Kapitoliige inaýgýratsiia rásimine kelmes buryn Djo Baiden jary Djillmen jáne Kamala Harris kúieýi Dag Emhoffpen birge Áýlie apostol Matfei soborynda duǵa oqý sharasyna qatysty. Bul shara bastalar aldynda prezident laýazymyn bosatyp jatqan Donald Tramp Aq úiden shyǵyp, tikushaqpen Floridaǵa ushyp ketti. Tramp sońǵy 150 jylda óziniń izbasarynyń ulyqtaý rásimine qatysýdan bas tartqan AQSh-tyń alǵashqy basshysy bolyp otyr.
Esesine bilikti tapsyrý rásimine vitse-prezident Maik Pens, onyń jubaiy - Karen Pens jáne Kongrestegi Respýblikalyq partiia atynan sailanǵan ókilder, sondai-aq AQSh-tyń burynǵy prezidentterinen rásimge kishi Djordj Býsh, Bill Klinton jáne Barak Obama jáne olardyń jubailary - Lora Býsh, Hillari Klinton, Mishel Obama qatysty.
Amerika Qurama Shtattarynyń 46-prezidenti Djo Baiden ekinshi dúniejúzilik soǵys kezinde orta taptan shyqqan katolik áýletinde dúniege kelgen. Ant berý rásimine ol óz áýletinde 1893 jyldan beri saqtalyp kelgen "Bibliiany" alyp kelgen. Buǵan deiin ol senator jáne vitse-prezident qyzmetterine kiriskende de osy dini kitapty ustap ant bergen.
Saltanatty rásimde AQSh-tyń memlekettik ánuranyn ánshi Ledi Gaga oryndady.
Kapitolii ǵimaraty 6 qańtarda Donald Tramp jaqtastarynyń shabýylyna ushyraǵandyqtan, inaýgýratsiia qarsańynda Vashingtonda qaýipsizdik barynsha kúsheitildi. Kongress ǵimaratynyń ainalasy tikenek temirli sharbaqpen qorshaldy. Qala basshylyǵy Vashington ortalyǵyndaǵy metro stansalar men joldardy japty. Tártipti qadaǵalaýǵa myńdaǵan politsei men Ulttyq gvardiianyń 25 myń sarbazy jumyldyryldy. Qalada tótenshe jaǵdai engizilgen.
Sharadan keiin Baiden men Harris Arlington ulttyq ziratyndaǵy Belgisiz soldat beiitine gúl shoqtaryn qoiý rásimine qatysatyny aitylýda. Budan ári Baiden prezident retinde birqatar jarlyq pen qaýlyǵa qol qoiýdy josparlaǵan. Onyń komandasynyń málimetinshe, másele Dúniejúzilik densaýlyq saqtaý uiymymen yqpaldastyqty qaita jandandyrý, Klimat jónindegi Parij kelisimine qaita qosylý, birneshe musylman elinen AQSh-qa kelýge tyiym salǵan Tramp tapsyrmasynyń kúshin joiý, AQSh-ta násildik teń quqyqty qamtamasyz etý boiynsha el úkimetiniń jumysyn jandandyrý, bala kezinde Amerikaǵa zańsyz kelgen azamattardyń quqyǵyn qorǵaýdy kúsheitý týrasynda bolyp otyr. Sonymen qatar, Baiden el halqyn azamattyq patriottyqqa shaqyryp, koronavirýs pandemiiasy kezinde maska taǵýǵa úndeýdi josparlaýda.
