«Táýelsiz elimizdiń qalyptasýyndaǵy Qazaqstan Respýblikasynyń Tuńǵysh Prezidenti Nursultan Nazarbaevtyń róli» degen taqyrypqa arnalǵan jiyndy «Nur Otan» partiiasy oblystyq filialy uiymdastyryp, bastaýysh partiia uiymdarynyń tóraǵalary, úkimettik emes uiymdar men jastar ókilderi qatysty.
Sharany filial tóraǵasynyń birinshi orynbasary Artýr Moldaǵulov ashyp, búkilhalyqtyq deńgeide atap ótiletin Táýelsizdigimizdiń mán-mańyzyna keńinen toqtaldy. Ata-babamyz ǵasyrlar boiǵy armandap, qol jetkize almai ketken egemendigimizdiń shirek ǵasyr bederinde elimiz álemge tanyldy. Osy kezeń aralyǵynda keń aýqymdy saiasi-ekonomikalyq, áleýmettik reformalar júzege asyrylyp, turǵyndardyń ómir súrý sapasy jaqsardy.
Partiia músheleri el Táýelsizdiginiń mereitoiyn óńirde keńinen atap ótýdiń is-josparlaryn qarastyryp, erekshe ekpin túsirip otyr. «Dýslyk» tatar-bashqurt etnomádeni birlestigi tóraǵasynyń orynbasary Fanis Litfýllinniń aitýynsha, Qazaqstan turǵyndary Elbasynyń kópvektorly saiasatyn qyzý qoldaidy. Tarihymyzǵa, tilimizge, dinimizge qatysty qýatty sheshimderdi qýana qabyldap, shynaiy táýelsizdikti qamtamasyz etý jolynda jumyla eńbek etip keledi. Ol halyqaralyq mańyzǵa ie memlekettik aktilerdiń birine Semei iadrolyq poligonyn jabý týraly Prezident Jarlyǵyn, «Nevada-Semei» sekildi tuńǵysh qoǵamdyq qozǵalystyń qurylýyna jol ashqanyn atady.
«ZIKSTO» aktsionerlik qoǵamynyń baiyrǵy jumysshysy Vitalii Bakýtin N.Nazarbaevtyń Qyzyljar óńirine kelgen jumys sapary barysynda kezdesýden alǵan áserimen bólisse, «Radýga» JShS bastaýysh partiia uiymynyń tóraǵasy Maksim Bolshedvorov kásipkerlikke memleket tarapynan kórsetilip otyrǵan zor qoldaýdyń nátijesinde óz ujymynyń elimizdegi iri kásiporyndardyń birine ainalǵanyn tilge tiek etti.
Ómir ESQALI,
«Egemen Qazaqstan»
Soltústik Qazaqstan oblysy
.jpeg)