Dúniejúzilik kóshpendiler oiyndary direktsiiasynyń burynǵy basshysy Nail Nurov asa iri kólemde para aldy degen kúdikpen qamaýǵa alyndy. Bul týraly jýrnalist Mihail Kozachkov óziniń Telegram-arnasynda jazdy, dep habarlaidy ult.kz.
Jariialanǵan aqparatqa sáikes, 59 jastaǵy burynǵy sheneýnik eki aptaǵa jýyq ýaqyttan beri Astanadaǵy tergeý izoliatorynda otyr. Derekkóz málimetinshe, Nail Nurovtyń ústinen sybailas jemqorlyq faktisi boiynsha qylmystyq is qozǵalǵan.
Nail Nurov buǵan deiin elimizdegi birqatar iri sporttyq jobalardy basqarǵan. Atap aitqanda, 2011 jylǵy Aziia oiyndaryn jáne 2017 jylǵy Ýniversiadany uiymdastyrý jumystaryna jetekshilik etken. Sondai-aq ol 2024 jyly ótken V Dúniejúzilik kóshpendiler oiyndaryna daiyndyq jumystaryn úilestirgen.
Mihail Kozachkovtyń málimetinshe, kóshpendiler oiyndarynan keiin quqyq qorǵaý organdary keibir nysandardyń qurylysyna qatysty suraqtar kótergen. Tergeý nusqasy boiynsha, direktsiia basshysy quny 500 million teńgeden asatyn etnoaýyl qurylyǵyna kelisim jasap, keiin merdigerden kelisimshart somasynyń 10 paiyzyn talap etken.
Sondai-aq tergeý barysynda qarajattyń Nurovqa qolma-qol berilgenin rastaityn dálelder jinalǵany aityldy. Budan bólek, merdiger onyń jeke paidalanýyna arnalǵan metall besedka ornatý shyǵyndaryn da kótergen kórinedi.
Tergeý nusqasyna sáikes, Nail Nurov jalpy alǵanda keminde 40 million teńge kóleminde zańsyz syiaqy alǵan bolýy múmkin.
Sot kúdiktige qatysty eki ai merzimge qamaýǵa alý túrindegi bultartpaý sharasyn sanktsiialady.
