QR Ekologiia, geologiia jáne tabiǵi resýrstar ministri Maǵzum Myrzaǵaliev pen Halyqaralyq Qaita qurý jáne damý bankiniń turaqty ókili Jan-Fransýa Marto Qazaqstandaǵy landshaftardy qalpyna keltirý jobasyn qarjylandyrý týraly kelisimge qol qoidy, dep habarlaidy "Ult aqparat".
Bul joba Jahandyq ekologiialyq qor baǵdarlamasy aiasynda Dúniejúzilik bank tarapynan 4,3 mln AQSh dollaryna qarjylandyryldy. Ol 2021-2025 jyldary iske asyrylmaq.
«Joba orman sharýashylyǵyn damytý máselelerin qozǵaidy, fermerlermen jáne jergilikti qoǵamdastyqtarmen tozǵan jerlerdi orman ósirý arqyly qalpyna keltirý jumystaryn kózdeidi. Onyń aiasynda Qyzylorda oblysyndaǵy Aral teńiziniń qurǵatylǵan túbindegi 300 myń ga memlekettik orman qory jerleri kartaǵa túsiriledi, qosymsha 50 myń ga orman ósirý úshin jobalaý-izdestirý jumystary júredi. Qyzylorda jáne Túrkistan oblystarynda 100 myń ga alqapta esepke alynbaǵan ormandar túgendeledi.
Qyzylorda oblysynyń Qazaly orman mekemesinde jyl saiynǵy ónimdiligi 4 mln dana sekseýilge jetetin, kóshet alańy 33 ga bolatyn orman tálimbaǵy qurylady. Sondai-aq, Qyzylorda qalasy ainalasynda 3 myń ga bolatyn Jasyl aimaq qurylady», - dep túsindirdi QR EGTRM Orman sharýashylyǵy jáne janýarlar dúniesi komiteti.
Sonymen birge, Shýchinsk qalasyndaǵy «Respýblikalyq orman selektsiialyq-tuqym ósirý ortalyǵy» RMQK bazasynda orman tuqymdarynyń genetikalyq banki qurylady. Jambyl oblysynyń Qosqudyq orman mekemesi jáne Qyzylorda oblysynyń Qazaly orman mekemesi úshin Orman sharýashylyǵy tehnikasy men jabdyqtaryn satyp alý sharalary qarastyrylǵan.
«Bul jobany iske asyrý respýblikanyń ormanyn arttyrýǵa, Qyzylorda jáne Jambyl oblystarynyń orman mekemeleriniń materialdyq-tehnikalyq bazasyn nyǵaitýǵa yqpal etedi dep kútilýde. Óz kezeginde Qyzylorda qalasynyń ainalasynda jasyl aimaq qurý jeldiń teris áserin, jerdiń tozýyn azaitady jáne óńirdiń ekologiialyq jaǵdaiyn jaqsartady. Jalpy, atalǵan barlyq sharalar Memleket basshysynyń 2 mlrd aǵash otyrǵyzý jónindegi tapsyrmasyn oryndaý aiasynda orman sharýashylyǵy jumystaryn sapaly júrgizýge múmkindik beredi», - deidi komitet.
