Astanada ótken Dúniejúzi qazaqtarynyń V quryltaiynda Qazaqstan jazýshylar odaǵynyń múshesi, «Daryn» memlekettik jastar syilyǵynyń iegeri, tanymal aqyn Dáýletkerei Kápuly jyrdan shashý shashty.
***
Qaiyń saýǵan qazaq edim, Altai – atamekenim,
Taǵdyr maǵan usynbaǵan baly menen shekerin.
Iranda da ilanbadym, basqa túsken taǵdyrǵa,
Júregimdi baýramady bóten áýen, bóten ún.
Parij benen Germaniia, Ombyda da qazaqpyn,
Shartaraptan tapqan edim jumyr bastyń jetegin.
Aiaǵymdy ańdyp bastym qiia-quzda, muzdaqta,
Tik basatyn saqtyǵyndai shyńdaǵy taýtekeniń.
Núkistegi Tólegenniń saǵynyshy em sarǵaiǵan,
Qaida júrsem qazaqtyǵym – júrektegi qan maidan.
Kókmoinaqpen Túrikpenniń túgel sharlap dalasyn,
Besqala men Qojaelindei qol bulǵadym shalǵaidan.
Qyrǵyz benen Qyrym astym, ádiletsiz ýaqytta,
Saryarqanyń bal qymyzy tamsandyryp tańdaidan.
Ólekshindei ómir keshý – namysyma qiianat,
Al, taǵdyrym sipamaǵan taiqy týǵan mańdaidan!
Aqyt qajy, Ospan edim, Altaidaǵy aq boran,
Qarsy kelgen ajalǵa da qas-kirpigin qaqpaǵan.
Gimalaida kiiz tósep túietaily asýǵa,
Taklamakan shólinde de janǵa daýa tappaǵan.
Káshmirge de jetken kóshpin Elishannyń jolymen,
Dúnieniń buryshynda dám bar ma men tatpaǵan?!
Atajurttan kindik úzip, urpaǵymnyń qamy úshin,
Taǵdyr keshtim, kishigirim – shubyryndy aqtaban!
Qazaq úshin qaida júrsem qaitalaýmen duǵamdy,
Halifa Altai bop oraldym qazaqshalap Qurandy.
Óztúriktiń Mustafasy em, jatqa namys bermegen,
Kúnderde de adaspadym naizaǵaily, tumandy.
Án bop estim Maira salǵan júrekterdi tebirentip,
Atam keshken ǵumyrdy oilap, janym jasqa shylandy.
Beibarystai jýsan ańsap, jyraqta ósken qozyńmyn,
Ańsaǵanym – Qypshaq dalam, qut tuǵyrym – Turan-dy!
Men baiyrǵy qazaq edim Bai-Ólkede baptalǵan,
Úmitimdi úzbegenmin arailanǵan aq tańnan.
«Jalamanyń jalasynan» áýpirimdep jan qalyp,
Tiri soiǵan tulybym da Kýnskamerada saqtalǵan.
Bostandyqtyń rýhyna besigimde talpynyp,
Qasqyrdaiyn siraǵymdy shainap úzip qaqpannan.
Elge ákelgen Qarjaýbaimyn Kúlteginniń kóktasyn,
Tańdaiymda baldai erip, Ultqa degen tátti arman!
Qudaimenen aramyzǵa aq tilekti elshi etip,
Eshkimge de bas imegen ór qazaqpyn, eńse tik,
Kókserkesi sekildenip tý-talaqai kókpardyń,
Jalǵandaǵy ǵumyrymdy qaisarlyqpen ólshetip.
Qazaqstan – júregime boitumardai jazylǵan,
Tarydaiyn shashylýdy ómirime enshi etip.
Atameken, saǵan jetip kóz jasymdy qurǵattym,
Kók Táńiri kózimizge kókbairaqty kórsetip!
Altynordam kúnnen kúnge qulpynaidai qulpyra,
Tarlanbozym taqymymda, tizginimdi qymqyra.
Bar qazaqqa qutty bolsyn, saýyn aitqan quryltai,
Kókbairaqtyń qyran ushqan biigine umtyla.
Táńirime táýba aitýmen duǵa qyldym, bas iip,
Atajurtqa jetpei qalǵan bozdaqtardyń rýhyna.
«Elim-aidyń» zaryn endi qulaǵyma estirtpe,
Elbasymen bolashaqqa qadam basqan jurtyma!
Ýai, Nuraǵa, qazaq úshin adamzattyń asyly,
Astanasy – Altynorda, iranbaqtyń jasyly.
Kúnge qulash sermep týǵan Kúlteginniń qylyshy,
Sary altynnan saýyt kigen Saq pen Ǵunnyń has uly.
Álemdegi bar qandastyń yqylasyn qabyl al,
Atajurtta basyn qosqan aq júrektiń shashýy.
Qaita órlegen qazaǵyma kók Táńiri qýat ber,
Jasai bersin, jainai bersin Qazaqstan ǵasyry...
Dáýletkerei Kápuly
.jpeg)