Ulttyq sport dese aldyna jan salmaityn aimaqtyń biri - Almaty oblysy. Talai dúldúlderdi topqa qosyp, dúbirli doda ótkizýde de eshkimnen kem túsip jatqan joq. At qulaǵynda oinaǵan shabandozdarymyz báigeniń aldyn bermei el mereiin asyryp, toptan ozyp júr. Máselen Qyrǵyz elinde ótken halyqaralyq Kóshpendiler oiynynda da alaman báigede Jetisýdyń júirigi dara kelip, eldiń atyn shyǵarǵan edi. Dál sol sátte bórkin aspanǵa atpaǵan qazaq jurty qalmaǵan shyǵar. Sonymen qatar Astana qalasynda ótken «Altyn tulpar» báigesinde de 51 shaqyrymdy erkin baǵyndyrǵan Ulan Omarovtyń «Jannur» atty sáigúligi birinshi kelip, shabandoz Ashat Álimjannyń juldyzy janǵany esten kete qoiǵan joq. Mine, osyndai jetistikke toly Almaty oblysynyń ulttyq sport mamandary óńirlik kommýnikatsiialar qyzmetine kelip, jýrnalistermen jaǵymdy jańalyqtarymen bólisti.
Atalmysh brifingke oblystyq dene shynyqtyrý jáne sport basqarmasy ulttyq jáne buqaralyq sport túrlerin damytý bóliminiń basshysy Almat Úshkempirov, oblystyq «Báige» ulttyq at sporty federatsiiasynyń prezidenti Rústem Dosjanov, toǵyzqumalaqtan oblystyq aǵa jattyqtyrýshy Ainur Moldahmetova jáne jas shabandoz Ashat Álimjan qatysty. Eń birinshi sóz alǵan Almat Toqtarbekuly oblysta ulttyq sport túrleri boiynsha atqarylyp jatqan jumystarǵa keńinen toqtaldy. Búgingi tańda 1384 dene shynyqtyrý ujymynda ulttyq sportpen ainalysýshylar sany 46566 adamdy quraidy. Onyń ishinde qazaq kúresimen 12850, toǵyzqumalaqpen 15800, qusbegi 162, handoiby 610, jekpe-jek 230, kókpar 4332 jáne ulttyq at sportymen 12582 adam shuǵyldanady. 2011 jyldan beri oblysta ulttyq at sporty klýby ashylǵan. Sondai-aq, oblys ortalyǵynda «Taldyqorǵan», Jambyl aýdanynda «Kókbastaý», Qarasai aýdanynda «Nurdaýlet», «Azem» atty zaman talabyna sai atshabarlar bar. Jetken jetistigimiz de bir tóbe. Mysalǵa, Taldyqorǵan qalasynda kókpardan Qazaqstan Respýblikasynyń chempionaty ótti. El birinshiligine barlyq oblystan kókpar komandalary kelip, apta boiy dúbirge bóledi. Mine, sol keskilesken tartysta oblystyq kókpar qurama komandasy úshinshi oryndy jeńip aldy. Qazaq kúresinen de qara jaiaý emespiz. Sheberligi asqan balýandarymyz ár kez bairaqty básekede oza shaýyp, oblys namysyn jyrtyp júr. Mysalǵa, tórtinshi respýblikalyq ardagerler spartakiadasynda 2, Qazaqstan halqy Assambleiasynyń 20 jyldyq merekesine orai uiymdastyrylǵan spartakiadasynda 1-oryndy jeńip aldy. Alaman báigede de juldyzymyz joǵary. Munan keiin sóz alǵan toǵyzqumalaqtan aǵa jattyqtyrýshy Ainur Moldahmetova ulttyq oiynymyz týraly biraz jaǵymdy jańalyqtyń betin ashty. Rasynda da, toǵyzqumalaq oiyny qarqyndy damyp keledi. Respýblikalyq chempionatta úzdik shyqqan oiynshylarymyz Aziia, Álem birinshilikterinde baq synap, el namysyn qulatpady. Tórtinshi ardagerler arasynda ótken spartakiadada birinshi oryndy jeńip aldyq. Dál qazirgi ýaqytta oblysta jastar arasynda el chempionaty ótýde, onda eki júzden asa toǵyzqumalaqshy qatysyp, apta boiy Taldyqorǵan qalasyn dúbirge bóleidi dep sózin túiindedi.
Al, at sporty federatsiiasynyń prezidenti Rústem Ámirǵazyuly at sportynyń qyr-syryna toqtaldy. Ásirese, kókpar oiyny oblysta jaqsy damyǵan. Munyń barlyǵy atalǵan sport klýbynyń músheleri. Kóshpendiler oiynynda da bizdiń oblystyń jigitteri ulttyq qurama sapynda óner kórsetti. Qazir aýdandarda arnaiy qazandyqtar ornatylyp, kókpardy damytyp keledi. Alǵashynda Jambyl men Qarasai aýdandarynda ǵana tynysy keń taraǵan sport, basqa aýdandardy da sharpydy. Búginde oblystyq chempionattar ótip turady. Mine, sol dodada Raiymbek, Kerbulaq, Eskeldi, Alakól, Panfilov aýdanynan kelgen kókparshylar jaqsy óner kórsetip júr. Mundai keleli jumystyń qarqyn alýyna Oryntai Ámirǵaliev aǵamyzdyń eńbegin aita ketken jón. Ultjandy azamat, kókpardyń damýyna bar kúsh-jigerin salýda. Bilikti maman keibir kemshin tustardy da tilge tiek etti. Máselen, kókpar oinaý úshin myqty jylqylardyń kerek ekeni anyq. Komandany atpen qamtamasyz etý úshin jaqsy jylqylardy satyp alýymyz kerek. Onyń baǵasy da ońai emes. Sol úshin jumystar jasap jatyrmyz. Kóptegen túiini qiyn máseleler bar. Aldaǵy ýaqytta sheshimin tabady degen senimdemiz dep sózin qorytyndylady. Sonymen qatar jýyrda «Jetisý júirigi» degen at báigesin uiymdastyrdyq. Bul dástúrli dodaǵa ainalady. Bul dodanyń mártebesi biik bolady degen oidamyz. Iá, osy tusta, bir jylda jeti kólikti tizgindegen úzdik shabandoz Ashat Álimjan da tilshilerdiń suraǵyna jaýap berip, óz jańalyǵymen bólisti. Jas shabandoz aldaǵy ýaqytta da el namysyn joǵary ustap, ulttyq sportty damytýǵa kúsh salatynyn aitty. Qarshadai bala jaqynda ǵana oblys ákiminiń Qurmet gramotasymen marapattalǵan. Osyndai jetkinshekterimiz kóp bolsa, rýhy biik ultjandy azamattarymyz kóp bolatyny haq.
Rishad Turǵanbaev
"Jetisý" gazeti
