Elimizde ónim sapasyn baqylaý jumystary kúsheitildi. Budan bylai Qazaqstan Respýblikasy Densaýlyq saqtaý ministrliginiń Taýarlar men kórsetiletin qyzmetter sapasyn jáne qaýipsizdigin baqylaý komiteti ai saiyn standartqa sáikes kelmeitin ónimder tizimin jariialaidy.
Basty maqsat – ónimniń qaýipsizdik monitoringin jasaý kezinde olardyń qaýipsizdigi men qaýipsizdigine qater tóndiretin ónimder týraly tutynýshylardy aqparattandyrý. Sáikes kelmeitin ónimder tizbesi komitet saitynda jańartylyp otyrady jáne qoljetimdilik úshin árdaiym ashyq turady. Sonymen qatar jalǵan sertifikattalǵan jáne sapasyz ónimder týraly aqparatty tekserýge múmkindik beredi.
«Qazirgi tańda Densaýlyq saqtaý ministrliginiń tsifrlandyrý basqarmasy 10 shildege deiin osy saittyń ár ónimge jáne Open API-ke shtrih-kodpen bailanystyrylý jumystarymen ainalysýda. Osynyń nátijesinde tutynýshylar dúkende turyp, barlyq ónimderdiń jalǵan sertifikattalǵanyn jáne sapa kórsetkishin teksere alady», - deidi Qazaqstan Respýblikasynyń Densaýlyq saqtaý vitse-ministri Oljas Ábishev.
Vitse-ministrdiń aitýynsha, Qazaqstanda jyl saiyn 22 tonnadan astam qaýipti azyq-túlik ónimderi joiylady. Sondai-aq, ai saiyn Qazaqstan Respýblikasy Densaýlyq saqtaý ministrliginiń Taýarlar men kórsetiletin qyzmetter sapasyn jáne qaýipsizdigin baqylaý komiteti 100-den astam qaýipti ónimder men taýarlardy anyqtaidy.
Aita keteiik, bul bastama 2019 jylǵy 2 mamyrda Qazaqstan Respýblikasy Densaýlyq saqtaý ministriniń buiryǵymen «Halyqtyń sanitarlyq-epidemiologiialyq salaýattylyǵy, gigienalyq normativter jáne tehnikalyq reglamentter salasyndaǵy normativtik quqyqtyq aktilerdiń talaptaryna sáikes kelmeitin ónim tizilimin júrgizý erejesi» zańnamalyq deńgeii erejesi negizinde bekitildi. Búgingi tańda «Tsifrly Qazaqstan» memlekettik baǵdarlamasy aiasynda densaýlyq saqtaý salasyn tsifrlandyrylý jumystary qarqyndy júrgizilýde.
