Oral qalasyndaǵy Dostyq úiinde Batys Qazaqstan oblysy ákiminiń orynbasary Ǵabidolla Ospanqulov óńirimizdegi etnomádeni ortalyq, BQO Qazaqstan halqy assambleiasynyń qurylymdyq bólimsheleriniń jetekshilerimen, «Qoǵamdyq kelisim» mekemesiniń qyzmetkerlerimen kezdesti.
Jiyndy ashqan oblystyq assambleia tóraǵasynyń orynbasary, hatshylyq meńgerýshisi Ǵaisa Qapaqov aityp ótkendei, kezdesýdiń maqsaty – taiaýda ǵana oblys ákiminiń áleýmettik saiasat, sonyń ishinde assambleia salasy boiynsha orynbasary bolyp taǵaiyndalǵan Ǵabidolla Abdollaulyn assambleia ókilderine jaqynyraq tanystyrý.
- Prezident Ákimshiliginiń kelisimimen rotatsiia tártibi boiynsha oblys ákiminiń orynbasary qyzmetine taǵaiyndaldym. Aldaǵy ýaqytta ózderińizben birge qoian-qoltyq jumys jasaimyz dep oilaimyn. Elbasmyzdyń saiasatyn Aq Jaiyq óńirinde júrgizý kezinde sizderdiń tájiribelerińizge arqa súieitin bolamyz. Ulttyq meiramdardy ótkizý jáne ózge de jumys baǵyttary kezinde sizderge qolymyzdan kelgenshe kómektesip, qoldaý kórsetemiz. Jańa myna Dostyq úiinde ornalasqan árbir etnomádeni ortalyqtyń bólmelerin kórip qýanyp qaldym. Olardyń bári ózderiniń ulttyq salt-dástúrleri men mádenietterine sai ádemi naqyshtalǵany kóńilimnen shyqty.
Ózderińiz jaqsy bilesizder, Elbasymyz ultaralyq, konfessiiaaralyq máselege jete mán berip otyr. Bul baǵytta júrgizilgen kóptegen jumystyń nátijesinde álem elderi beibitshilik pen turaqtylyqty saqtaý boiynsha Qazaqstannyń saiasatyn moiyndady. Qazirgi tańda respýblikamyz túrli elderdi bitimgerlikke shaqyrý boiynsha mediatorlyq qyzmet atqarýda. Siriiadaǵy jaǵdaidy turaqtandyrýǵa bailanysty bitimgershilik sharalar Astanada áli de jalǵasyn tabýda. Memleketimizdiń osyndai igi isi oidaǵydai júzege asyp qana qoimai, kópshilikke úlgi bolýda.
Elimizdiń erteńgi urpaǵynyń jaǵdaiy búgingi biz atqaryp jatqan eńbekpen tyǵyz bailanysty. Sol sebepti erteńgi jarqyn bolashaq úshin bárimiz bir atanyń balasyndai yntymaqtasa jumys isteitinimizge senimdimin, - dedi Ǵabidolla Abdollauly.
Sodan keiin sóz alǵan oblystyq assambleia janyndaǵy analar keńesiniń tóraiymy Shalqyma Qurmanalina, orys mádeniet ortalyǵynyń tóraǵasy Sergei Pogodin, «Vainah» sheshen-ingýsh mádeni ortalyǵynyń jetekshisi Danilbek Saratov, «Oral-Jaiyq kazaktary» birlestiginiń basshysy Anatolii Avilov jáne ózgeleri Ǵabidolla Abdollaulynyń qyzmetine tabys tilep, bir jaǵadan bas, bir jeńnen qol shyǵaryp jumys jasaýǵa ázir ekenderin aitty.
Sáken ÁBILHALYQOV
.jpeg)