Ońtústik Qazaqstan oblysynan Ózbekstanǵa jol tartqan «Dostyq kerýeni» jobasyna qatysýshylar búgin elge oraldy, dep habarlaidy "Ult aqparat".
Quramyna ziialy qaýym ókilderi, eńbek ardagerleri, etno-mádeni birlestikterdiń tóraǵalary men BAQ ókilderi engen kerýendi Ózbekstandaǵy Qazaq ulttyq mádeni ortalyǵynyń basshylyǵy kútip alyp, kórshiles eldiń tarihi-mádeni oryndarymen tanystyrdy.
Baýyrlas elder arasynda dostyq qarym-qatynasty nyǵaitý maqsatynda uiymdastyrylǵan sapar aiasynda qazaqstandyqtar aldymen Tashkenttegi Tóle baba kesenesine ziiarat etti. Samarqandaǵy áigili Registan tarihi-sáýlettik keshenimen tanysyp, Shahi-Zinda tarihi kesheninde jerlengen Ózbekstannyń eks-prezidenti Islam Karimovtyń rýhyna Quran aiattaryn baǵyshtady. Buharadaǵy Bahaýaddin Nakshbandi mavzoleiin aralap kórdi.
- Bul issapar Ózbekstan Respýblikasynyń Prezidenti Shavkat Mirziioevtiń naýryz aiynda Qazaqstanǵa jasaǵan resmi sapary kezinde Qazaqstan halqy assambleiasy men Ózbekstan internatsionaldy mádeni ortalyǵynyń arasynda túzilgen yntymaqtastyq týraly memorandým aiasynda uiymdastyrylyp otyr. Memorandým eki el arasyndaǵy mádeni yqpaldastyqty arttyryp, Qazaqstan halqy assambleiasy men Ózbekstan internatsionaldy mádeni ortalyǵynyń áriptestigin nyǵaitýdy kózdeidi. Sonyń aiasynda etnosaralyq birlikti qamtamasyz etip otyrǵan uiymdardyń qos elge etnosaiahat uiymdastyrýyna múmkindik berip otyr. Dostyq kerýeni OQO Qazaqstan halqy assambleiasynyń uiymdastyrýymen Ózbekstanǵa ekinshi ret jol tartyp otyr. Dostyq niettegi ózbekstandyq delegattar da Ońtústik Qazaqstan oblysynyń tarihi oryndaryna saiahattar uiymdastyrýda, - deidi kerýendi bastap barǵan oblys ákimi apparatynyń «Qoǵamdyq kelisim» KMM basshysy Erbol Baiqonaqov.
Resmi málimetterge sáikes, búginde Ózbekstanda 800 myńnan astam qandastarymyz turady. Al Qazaqstandaǵy ózbek etnosy ókilderiniń sany 550 myńǵa jýyqtaidy. Aldaǵy ýaqytta «Dostyq kerýeni» jobasy eki el arasyna mádeni yqpaldastyqty odan ári nyǵaitaryna senim mol.
