Burynǵy vitse-premer, búgingi Ulttyq bank tóraǵasy Erbolat Dosaevtyń jańa qyzmetke kelýin kásipkerler jaqsy qabyldap jatyr. Astanada «Memleket basshysy Joldaýynda, Bes áleýmettik bastamada atap ótken tapsyrmalardy iske asyrý aiasynda ekonomikalyq ósimniń jańa úlgisin qalyptastyrý, halyqtyń kiristerin jáne ómir súrý sapasyn arttyrý» taqyrybynda ótken paneldik sessiiada «Atameken» Ulttyq kásipkerler palatasy basqarma tóraǵasynyń orynbasary Eldar Jumaǵaziev osylai aitty, dep habarlaidy QazAqparat tilshisi.
«Sońǵy kezdegi ishki ónimdegi nesieniń úlesi azaiǵan edi. Osyǵan bailanysty Erbolat Dosaevtyń Ulttyq bankke kelýin kásipkerler jaqsy qabyldap jatyr. Sebebi, sońǵy kezderi ony biz ekonomikaǵa jaýap bergen vitse-premer retinde kórdik. Qoian-qoltyq jumys atqardyq. Úmitimiz zor», - deidi Eldar Jumaǵaziev.
«Atameken» UKP basqarma tóraǵasynyń orynbasary atap ótkendei, jalpy zańdy tulǵalardyń úlesine qaraityn bolsaq, kásipkerlerdiń ishinde nesielik deńgei byltyr 4,6 paiyzǵa tómendep, qarapaiym halyqtyń úlesi 16,8 paiyzǵa ósken.
«Nesie berýde elimizde keibir máseleler bar. Ony biz jasyrmaimyz. Ekinshi jaǵynan, nesie alatyn mekemeler de óńirlerde kóp emes. Elbasynyń tapsyrmasy boiynsha eksportqa baǵyttalǵan kompaniialarǵa 600 mlrd teńge berilgeli otyr. Shyny kerek, ekportqa shyǵarýǵa múmkindigi bar kompaniialardy qazirgi ýaqytta izdep jatyrmyz», - deidi Eldar Jumaǵaziev.
Onyń aitýyna qaraǵanda, shikizatty óńdep, eksportqa shyǵarýǵa qaýqarly kompaniialar izdestirilýde.
«Ol máseleni Úkimettiń keńeitilgen otyrysynda Prezident te kóterip, ol sanatta qansha kompaniia bar ekenin suraǵan edi. 30-ǵa tarta kompaniiaǵa diagnostika jasaldy. Eksportqa áleýeti bar kompaniialar belgili bir máseleni aitady: eń birinshisi ári irisi - kýrs boiynsha aiyrmashylyq. Bizdiń kóptegen kompaniialar eksportqa ónim shyǵarýǵa qaýqarly bolsa da, shikizatty kóbine-kóp Reseiden alady. Al Reseidegi aqshanyń kýrsy ósip keter bolsa, shikizattyń baǵasy da sharyqtaidy. Ekinshiden, qaryz alý boiynsha banktiń paiyzdary. Ainalymdaǵy kapitaldy qarjylandyrýdyń ótkir qajettiligi bar. Óndiristi arttyrý baǵytynda investitsiia qajet bolyp jatady», - deidi ol.
Eldar Jumaǵaziev óz sózinde keide kásipkerlerdiń qarapaiym tilmen aitqanda bilimderi de jetispei jatatynyn aityp ótti.
«Belgili bir kompaniianyń qarjylyq ahýalyna taldaý jasar bolsaq, sol mekemeni basqaryp otyrǵan basshysynyń óziniń bilim deńgeii jetispeitinin kóremiz. Soǵan bailanysty biz usynys berip, ortańqol kásipkerlerdi oqytýǵa shaqyramyz. Oqytý múmkindikterin qarastyryp jatyrmyz», - deidi ol.
