بۇرىنعى ۆيتسە-پرەمەر, بٷگٸنگٸ ۇلتتىق بانك تٶراعاسى ەربولات دوساەۆتىڭ جاڭا قىزمەتكە كەلۋٸن كەسٸپكەرلەر جاقسى قابىلداپ جاتىر. استانادا «مەملەكەت باسشىسى جولداۋىندا, بەس ەلەۋمەتتٸك باستامادا اتاپ ٶتكەن تاپسىرمالاردى ٸسكە اسىرۋ اياسىندا ەكونوميكالىق ٶسٸمنٸڭ جاڭا ٷلگٸسٸن قالىپتاستىرۋ, حالىقتىڭ كٸرٸستەرٸن جەنە ٶمٸر سٷرۋ ساپاسىن ارتتىرۋ» تاقىرىبىندا ٶتكەن پانەلدٸك سەسسييادا «اتامەكەن» ۇلتتىق كەسٸپكەرلەر پالاتاسى باسقارما تٶراعاسىنىڭ ورىنباسارى ەلدار جۇماعازيەۆ وسىلاي ايتتى, دەپ حابارلايدى قازاقپارات تٸلشٸسٸ.
«سوڭعى كەزدەگٸ ٸشكٸ ٶنٸمدەگٸ نەسيەنٸڭ ٷلەسٸ ازايعان ەدٸ. وسىعان بايلانىستى ەربولات دوساەۆتىڭ ۇلتتىق بانككە كەلۋٸن كەسٸپكەرلەر جاقسى قابىلداپ جاتىر. سەبەبٸ, سوڭعى كەزدەرٸ ونى بٸز ەكونوميكاعا جاۋاپ بەرگەن ۆيتسە-پرەمەر رەتٸندە كٶردٸك. قويان-قولتىق جۇمىس اتقاردىق. ٷمٸتٸمٸز زور», - دەيدٸ ەلدار جۇماعازيەۆ.
«اتامەكەن» ۇكپ باسقارما تٶراعاسىنىڭ ورىنباسارى اتاپ ٶتكەندەي, جالپى زاڭدى تۇلعالاردىڭ ٷلەسٸنە قارايتىن بولساق, كەسٸپكەرلەردٸڭ ٸشٸندە نەسيەلٸك دەڭگەي بىلتىر 4,6 پايىزعا تٶمەندەپ, قاراپايىم حالىقتىڭ ٷلەسٸ 16,8 پايىزعا ٶسكەن.
«نەسيە بەرۋدە ەلٸمٸزدە كەيبٸر مەسەلەلەر بار. ونى بٸز جاسىرمايمىز. ەكٸنشٸ جاعىنان, نەسيە الاتىن مەكەمەلەر دە ٶڭٸرلەردە كٶپ ەمەس. ەلباسىنىڭ تاپسىرماسى بويىنشا ەكسپورتقا باعىتتالعان كومپانييالارعا 600 ملرد تەڭگە بەرٸلگەلٸ وتىر. شىنى كەرەك, ەكپورتقا شىعارۋعا مٷمكٸندٸگٸ بار كومپانييالاردى قازٸرگٸ ۋاقىتتا ٸزدەپ جاتىرمىز», - دەيدٸ ەلدار جۇماعازيەۆ.
ونىڭ ايتۋىنا قاراعاندا, شيكٸزاتتى ٶڭدەپ, ەكسپورتقا شىعارۋعا قاۋقارلى كومپانييالار ٸزدەستٸرٸلۋدە.
«ول مەسەلەنٸ ٷكٸمەتتٸڭ كەڭەيتٸلگەن وتىرىسىندا پرەزيدەنت تە كٶتەرٸپ, ول ساناتتا قانشا كومپانييا بار ەكەنٸن سۇراعان ەدٸ. 30-عا تارتا كومپانيياعا دياگنوستيكا جاسالدى. ەكسپورتقا ەلەۋەتٸ بار كومپانييالار بەلگٸلٸ بٸر مەسەلەنٸ ايتادى: ەڭ بٸرٸنشٸسٸ ەرٸ ٸرٸسٸ - كۋرس بويىنشا ايىرماشىلىق. بٸزدٸڭ كٶپتەگەن كومپانييالار ەكسپورتقا ٶنٸم شىعارۋعا قاۋقارلى بولسا دا, شيكٸزاتتى كٶبٸنە-كٶپ رەسەيدەن الادى. ال رەسەيدەگٸ اقشانىڭ كۋرسى ٶسٸپ كەتەر بولسا, شيكٸزاتتىڭ باعاسى دا شارىقتايدى. ەكٸنشٸدەن, قارىز الۋ بويىنشا بانكتٸڭ پايىزدارى. اينالىمداعى كاپيتالدى قارجىلاندىرۋدىڭ ٶتكٸر قاجەتتٸلٸگٸ بار. ٶندٸرٸستٸ ارتتىرۋ باعىتىندا ينۆەستيتسييا قاجەت بولىپ جاتادى», - دەيدٸ ول.
ەلدار جۇماعازيەۆ ٶز سٶزٸندە كەيدە كەسٸپكەرلەردٸڭ قاراپايىم تٸلمەن ايتقاندا بٸلٸمدەرٸ دە جەتٸسپەي جاتاتىنىن ايتىپ ٶتتٸ.
«بەلگٸلٸ بٸر كومپانييانىڭ قارجىلىق احۋالىنا تالداۋ جاسار بولساق, سول مەكەمەنٸ باسقارىپ وتىرعان باسشىسىنىڭ ٶزٸنٸڭ بٸلٸم دەڭگەيٸ جەتٸسپەيتٸنٸن كٶرەمٸز. سوعان بايلانىستى بٸز ۇسىنىس بەرٸپ, ورتاڭقول كەسٸپكەرلەردٸ وقىتۋعا شاقىرامىز. وقىتۋ مٷمكٸندٸكتەرٸن قاراستىرىپ جاتىرمىز», - دەيدٸ ول.
