Bank sektorynyń jiyntyq aktivteri 2021 jyly 37,6 trln teńge boldy. Bul týraly QR Ulttyq bank tóraǵasy Erbolat Dasaev aitty, dep habarlaidy QazAqparat.
«Qarjy júiesiniń turaqtylyǵy, birinshi kezekte, bank sektorynyń ornyqtylyǵymen aiqyndalady. 2020 jyldan bastap Qarjy naryǵyn retteý jáne damytý agenttigi (QNRDA) Ulttyq bankpen birlesip qarjy sektoryn qalpyna keltirý, aktivter sapasyn baǵalaý (AQR) jáne biznes-protsester men táýekel menedjmentin jaqsartý jónindegi túzetý is-sharalary boiynsha jumys júrgizdi. Ýaqtyly qabyldanǵan birlesken sharalarǵa bailanysty qalyptasqan ornyqtylyq býferi búgingi kúni klientter qarajatynyń saqtalýyn qamtamasyz ete otyryp, halyqqa jáne bizneske qyzmet kórsetý úshin ekinshi deńgeidegi bankterdiń operatsiialyq qyzmetin úzdiksiz júzege asyrýǵa múmkindik beredi», dedi ol Memleket basshysynyń biznes ókilderimen kezdesýinde.
Dosaevtyń dereginshe, bank sektorynyń jiyntyq aktivteri 2021 jyly 6,5 trln teńgege ósip, 37,6 trln teńge boldy. Bankterdiń menshikti kapitaly 2021 jyldyń sońynda 4,5 trln teńgege jetti. Ekinshi deńgeidegi bankterde birinshi deńgeidegi menshikti kapitaldyń jetkiliktilik koeffitsienti 19,3 paiyz boldy. Bul eń tómengi retteýshilik talaptardan 3 ese artyq.
«Ótimdi aktivter 1,5 trln teńgege ósip, 16,2 trln teńge boldy, bul bank sektorynyń jiyntyq aktivteriniń 43 paiyzyn quraidy. Ótimdilik kólemi qajetti deńgeiden 4 ese asady», dedi Ulttyq bank tóraǵasy.
