Qazaqstanda azyq-túlik pen ózge de taýarlar qymbattady. Bul týraly QR Ulttyq banki tóraǵasy Erbolat Dosaev Úkimet otyrysynda baiandady, dep habarlaidy "Ult aqparat".
«Tótenshe jaǵdai men karantin talaptarynda tamaq ónimderine suranystyń ósýinen Qazaqstandaǵy jyldyq infliatsiia údeýin jalǵastyrdy jáne eki ai qatarynan 2020 jyly 4-6% nysanaly dálizden asty. Biylǵy sáýirde infliatsiia 6,8% deńgeiinde qalyptasty. Saýdalyq seriktes elderde karantin sharalary engizilip, import shekteldi jáne usynystyń jetkiliksiz bolýynan azyq-túlik taýarlary baǵasy bir aida 1,9% ósti, jyldyq ósim 10,4%-ke deiin jyldamdady. Bul - 2017 jyldan bergi eń joǵary ósim», - dedi Erbolat Dosaev qańtar-sáýirdegi áleýmettik-ekonomikalyq damý qorytyndylary týraly Úkimet otyrysynda.
Spikerdiń aitýynsha, biylǵy sáýirde kóbinese jemister men kókónister – 5,6%, qant – 6,2% jáne jarmalar – 3,4% qymbattady.
«Saýda jáne servis obektileri qyzmetiniń toqtatylýyna bailanysty azyq-túlikke jatpaityn taýarlar men aqyly qyzmetter baǵasynyń da ósýi aldyńǵy aidyń deńgeiinde saqtalyp otyr. Azyq-túlikke jatpaityn taýarlar baǵasy jyldyq mánde 5,4%-ke ósti. Ulttyq valiýtanyń álsireýine bailanysty dári-dármekter men jeke qoldanystaǵy taýarlar siiaqty jekelegen taýarlar baǵasynyń ósýi janar-jaǵarmai baǵasynyń tómendeýimen retteldi. Aqyly qyzmetter baǵasynyń jyldyq ósýi 3,5% deńgeiinde saqtaldy», - dedi E. Dosaev.
