Shaǵyn jáne orta biznes - ekonomikanyń negizin qalaýshy jáne Almatynyń basty jumys berýshisi. Bul týraly qala ákimi Erbolat Dosaev Almaty qalasy máslihatynyń XVI sessiiasynda aitty, dep habarlaidy QazAqparat.
Jiyn barysynda Erbolat Dosaev búginde Almaty qalasy ákimdiginiń mańyzdy mindetteriniń biri megapolistiń ekonomikasyn qalpyna keltirý jáne órship turǵan geosaiasi táýekelder jaǵdaiynda ony odan ári damytý ekenin jetkizdi.
«Qalany qysqa merzim ishinde qalpyna keltirý jáne onyń kelbetin burynǵydan da jaqsartý qajet. Biylǵy jyldyń 3-20 aqpan aralyǵynda men qalanyń barlyq aýdandaryn aralap, turǵyndarmen jáne biznes ókilderimen kezdesýler ótkizdim. Sonyń negizinde ákimdik qala biýdjetine engiziletin ózgeristerdi daiyndady. Shaǵyn jáne orta biznes ekonomikanyń negizin qalaýshy jáne Almatynyń basty jumys berýshisi bolyp tabylady, sebebi onda qalanyń árbir úshinshi turǵyny eńbek etedi. Osyǵan bailanysty, shaǵyn jáne orta biznesti qalpyna keltirý jáne keltirilgen zalaldy óteý jumysy ákimdiktiń basym mindeti», - dedi Almaty qalasynyń ákimi.
«Atameken» ulttyq kásipkerler palatasynyń málimeti boiynsha osy jyldyń 1 naýryzynda 1 413 zardap shekken shaǵyn jáne orta biznes sýbektisi tirkelgen.
Zalaldyń aldyn ala somasy 34 mlrd teńge. Qazirgi tańda infokazakhstan.kz portalynda 1201 ótinim tirkeldi, onyń ishinde 3,774 mlrd teńge somasyna 1 009 shaǵyn jáne orta biznes sýbektisine keltirilgen zalal ótelgen.
Sonymen qatar, ákim adami kapitaldy damytý ákimdiktiń turaqty nazarynda ekenin aitty. Almaty biýdjeti de osyǵan baǵdarlanǵanyn, iaǵni qala biýdjeti áleýmettik salaǵa baǵyttalǵan.
«2022 jyly bilim berýge 275,2 mlrd teńge qarastyrylǵan, onyń ishinde jergilikti biýdjetten - 196,2 mlrd, respýblikalyq biýdjet – 79 mlrd. Biýdjetti naqtylaý aiasynda qosymsha 9,4 mlrd teńge bólý josparlanyp otyr. 2022 jyly oqýshy ornynyń tapshylyǵyn azaitý maqsatynda 46 mekteptiń qurylysy jalǵasyp, 14 245 oqýshy ornyna eseptelgen 22 mektep biyl paidalanýǵa beriledi. Sondai-aq Bostandyq, Áýezov, Almaly, Jetisý aýdandaryndaǵy mektepterge japsarlas 5 ǵimarattyń qurylysyn aiaqtaýǵa qosymsha 1,8 mlrd teńge bólý usynyldy», - dedi ol.
