Áleýmettik jelidegi «haip» úshin adam urlaý kórinisin uiymdastyrý, tóbeles kórsetý jáne ádepsiz kontent taratý — toǵyz qazaqstandyq strimerdiń jaýapqa tartylýyna sebep boldy, dep habarlaidy ult.kz.
Qazaqstan Ishki ister ministrligi áleýmettik jelilerde zań talaptaryn buzǵan toǵyz qoldanýshyǵa qatysty ákimshilik shara qoldandy. Bul týraly Polisia.kz habarlady.
IIM málimetinshe, keibir kontent avtorlary qaralym, laik jáne donat úshin shekten shyǵyp, qaýipti áreketterge barǵan. TikTok jelisindegi tikelei efirlerde balaǵat sózder aitý, ádepsiz qylyqtar kórsetý, adamdardy qorlaý jáne qaýipti prankter uiymdastyrý faktileri anyqtalǵan.
Ministrlik mundai kontenttiń ásirese kámeletke tolmaǵandarǵa keri áser etetinin atap ótti.
Astanada TikTok-ta «Baýyrsaq» laqap atymen tanylǵan 37 jastaǵy turǵyn tikelei efir kezinde balaǵat sózder aityp, zańǵa qaishy kontent taratqan. Ol usaq buzaqylyq jasaǵany úshin ákimshilik jaýapkershilikke tartylyp, aiyppul salyndy.
Almatyda 32 jastaǵy Batyrbek Aqtóre Seisembekuly tikelei efir barysynda ainalasyndaǵylardy balaǵattap, qorlaǵan. Sot sheshimimen oǵan bes táýlik ákimshilik qamaý jazasy taǵaiyndaldy.
Shymkentte 20 jastaǵy Seidaliev Daniiar aýditoriia nazaryn aýdarý úshin tikelei efirde elektroshoker qoldanǵan jáne adam urlaý kórinisin ádeii uiymdastyrǵan. Sonymen qatar efir kezinde balaǵat sózder aityp, qoǵamdyq tártipti buzǵany úshin ol segiz táýlikke ákimshilik qamaýǵa alyndy.
Jambyl oblysynda «Altyn qyz» laqap atymen tanymal 41 jastaǵy turǵyn birneshe ret tikelei efirge shyǵyp, ádepsiz sózder aityp, quqyqqa qaishy kontent taratqan. Oǵan ákimshilik aiyppul salyndy.
Sol oblysta 19 jastaǵy Baibek Jarqynai men Tanaberganov Asyljan donat jinaý jáne kórermen sanyn arttyrý maqsatynda tikelei efirde bir-birine ádeii dene jaraqatyn keltirip, «haip» úshin tóbeles kórsetken. Ekeýi de zań aldynda jaýap berdi.
IIM áleýmettik jelidegi anonimdilik quqyq buzýshylardy jaýapkershilikten bosatpaitynyn eskertti. Vedomstvo kez kelgen zań buzýshynyń jeke basyn anyqtaýǵa múmkindik beretin quraldarǵa ie ekenin málimdedi.
«Zańǵa qaishy árbir áreket anyqtalyp, quqyq buzýshy zań talaptaryna sáikes jaýapqa tartylady. Aldaǵy ýaqytta da mundai faktilerdiń aldyn alý maqsatynda quqyq buzýshylar týraly aqparat jariialanyp otyrady», — dedi IIM resmi ókili Shyńǵys Alekeshev.
Ministrlik qoǵamnyń tsifrlyq keńistiktegi mádenietin qorǵaý jáne jastarǵa keri áser etetin zorlyq-zombylyq pen ádepsiz kontenttiń taralýyna jol bermeý jumystary jalǵasatynyn atap ótti.
