Foto: Gage Skidmore (Wikimedia Commons)
Tramp óz jaqtastaryna úndeý jasap, AQSh prezidenttik sailaýynda jeńiske jetkenin málimdedi. Respýblikalyq partiianyń kandidaty sońǵy esepter boiynsha 267 sailaýshy daýysyn jinap, resmi jeńis úshin nebári úsh daýysqa jetpei tur.
NBC News aqparatynsha, Donald Tramp barlyq shtattaǵy daýystardyń tolyq sanalýyn kútpesten, Pensilvaniia siiaqty birneshe negizgi shtattardaǵy jeńisterinen keiin jaqtastaryna sóz sóiledi. Ol óziniń prezidenttikke sailanýy «eldi emdeýge kómektesetinin» aitty.
«Meni ózderińizdiń 47-shi jáne 45-shi prezidentterińiz etip sailaǵandaryńyz úshin Amerika halqyna zor alǵysymdy bildiremin», — dedi Tramp óz aldyńǵy merzimin eske sala otyryp.
Tramp resmi sailanǵannan keiin vitse-prezident bolatyn Djek Vens birinshi bolyp ony jeńisimen quttyqtady:
«Biz Amerika Qurama Shtattary tarihyndaǵy eń uly saiasi oralýdyń kýási boldyq dep oilaimyn», — dedi Vens.
The Associated Press agenttiginiń habarlaýynsha, birneshe álemdik kóshbasshylar Trampty resmi jeńis rastalmasa da, quttyqtap úlgerdi.
Izrail premer-ministri Biniamin Netaniahý áleýmettik jelidegi jazbasynda Tramptyń Aq úige tarihi oralýy Amerikanyń jańa kezeńine bastaý bolyp, Izrail men Amerikanyń odaǵyn nyǵaitatynyn aitty.
Ýkraina prezidenti Vladimir Zelenskii de Trampty alǵashqylardyń biri bolyp quttyqtap, bylai dep jazdy:
«Prezident Tramptyń jahandyq isterde «kúsh arqyly beibitshilik» printsipine berilgendigin joǵary baǵalaimyn. Bul ádil beibitshilikke jaqyndaýdyń naqty joly. Bul printsipti birge júzege asyramyz dep úmittenemin».
Frantsiia prezidenti Emmaniýel Makron óz quttyqtaýynda Tramppen aldaǵy tórt jylda beibitshilik pen órkendeý jolynda yntymaqtasa jumys isteýge daiyn ekenin atap ótti.
NATO bas hatshysy Mark Riýtte de respýblikalyqtardy quttyqtap, Tramppen birlesken qurylymdy jumys kútip otyrǵanyn aitty.
Donald Tramptyń jeńisi resmi túrde áli rastalmasa da, AQSh sailaýynyń nátijesi is júzinde sheshilgen. Demokratiialyq partiia ókili Kamala Harristiń jeńis úshin qajet 270 daýys jinaýǵa múmkindigi qalmady (The Associated Press málimetinshe, Harristiń esebinde 224 daýys bar).
.jpg)