Aqtóbe qalalyq soty 35 jastaǵy Azat Qonysqa qatysty qylmystyq is boiynsha úkim shyǵardy. Ol Qylmystyq kodekstiń 174-babynyń 1-bóligi («Dini alaýyzdyqty qozdyrý») boiynsha kináli dep tanylyp, 3 jyl 6 aiǵa bas bostandyǵynan aiyryldy. Jazasyn qaýipsizdigi ortasha qylmystyq-atqarý júiesi mekemesinde óteidi, dep habarlaidy ult.kz.
Sot materialdaryna sáikes, sottalýshy áleýmettik jelidegi tikelei efir barysynda qazaqtyń ulttyq aspaby – dombyraǵa qatysty qorlaityn pikir aityp, Qazaqstan musylmandary dini basqarmasy ókilderin balaǵattaǵan.
Memlekettik aiyptaýshynyń aitýynsha, onyń málimdemeleri dini jáne ulttyq alaýyzdyqty qozdyrý belgilerin qamtyǵan. Prokýror sottan sottalýshyǵa 3 jyl 6 ai merzimge bas bostandyǵynan aiyrý jazasyn taǵaiyndaýdy surady.
Sot otyrysynda Azat Qonys óz kinásin tolyq moiyndap, aitqan sózderine ókinetinin jetkizdi. Ol qazaq halqynan keshirim surap, ózin bas bostandyǵynan aiyrmaýdy ótingen.
Alaida sot onyń áreketterin qylmystyq quqyqbuzýshylyq dep tanyp, 3 jyl 6 aiǵa bas bostandyǵynan aiyrý týraly úkim shyǵardy.
Eske salaiyq, áleýmettik jelide taraǵan videodan keiin quqyq qorǵaý organdary onyń jeke basyn anyqtap, kúdiktini ustap, ýaqytsha ustaý izoliatoryna qamaǵan bolatyn.
