QR Sybailas jemqorlyqqa qarsy is-qimyl agenttiginiń seriktestik departamentiniń bas sarapshysy Symbat Israpýlova memlekettik qyzmetshilerge azamattardyń jii beretin syilyqtaryn atady, dep habarlaidy QazAqparat.
«2019 jyly memlekettik qyzmetshilerdiń óz erkimen arnaýly memlekettik qorǵa ótkizgen syilyqtarynyń baǵasy 683 212 teńgeni qurady. «Eń kóp taralǵan syilyqtar» tizimin kosmetikalyq syilyq jiyntyqtary, azyq-túlik ónimderi bastaidy. Biyl syilyqtar arasynda mýzykalyq aspap (dombyra), tumar, erlerdiń moiynoraǵyshy, «Adidas» firmasynyń sporttyq kostiými, «Tissot» qol saǵaty, «Delphi» kornishondarymen qaptalǵan záitún,qymbat alkogol, tipti pijama da kezdesti», - deidi Symbat Israpýlova agenttikte ótken baspasóz máslihatynda.
Agenttik ókiliniń aitýynsha, «alǵystyń» keń taralǵan túrleri – uialy telefon balansyn toltyrý, 1000-2000 teńge nominalymen aqshalai qarajat túrinde materialdyq syiaqy berý. Jiyn barysynda azamattardyń memlekettik qyzmetshilerge «alǵys bildirýiniń» jekelegen mysaldary da aityldy.
«Aqmola oblysynda bir azamat «Qazposhta» AQ poshta bailanysy arqyly Kókshetaý qalalyq sotyna neke buzý týraly isti qaraýdy jedeldetý týraly ótinishpen hat salynǵan konvertti jáne nominaly 2 000 teńge aqsha kýpiýrasyn joldap, ol úshin 353 500 teńge aiyppul túrinde ákimshilik jaýapkershilikke tartyldy. Sol sekildi Aqtóbe, Qyzylorda, Atyraý jáne Shyǵys Qazaqstan oblystarynda probatsiia qyzmetiniń inspektorlaryna uialy telefon balansyn toltyrý jáne aqsha kýpiýralaryn berý arqyly zańsyz materialdyq syiaqy berý úshin probatsiialyq baqylaýda turǵan 14 azamat jalpy somasy 5 858 000 teńgege aiyppul túrinde ákimshilik jaýapkershilikke tartyldy», - deidi ol.
Eske sala ketsek, buǵan deiin Symbat Israpýlova memlekettik qyzmetshilerdiń zańdy buzyp syilyq alý faktilerin anyqtaý boiynsha qoǵamdyq monitoring júrgizilip jatqanyn málim etken bolatyn.
