Ótken aptada elimizdegi áleýmettik shielenister men barreline 50 dollarǵa jete almaǵan Brent markaly munaiynyń áserinen teńge quny dollarǵa qatysty 2,58 paiyzǵa álsiregen bolatyn. Osylaisha, ótken aptada Qazaqstannyń qor birjasynda dollar quny, orta eseppen, 336,37 teńgeni qurady. 25 maýsymdaǵy kýrsqa sáikes, 1 AQSh dollaryn qazaqstandyqtar 336,48 teńgege satyp alady.
“Forex club” kompaniialar klýby sarapshysy Anatolii Ahmetovtiń aitýynsha, osy aptada ulttyq valiýtamyzdyń dollarǵa qatysty quny 335 pen 337 teńgege aralyǵynda quldyraýy múmkin. Mamannyń aitýynsha, bul aptada munai quny birkelki bolyp, naryqtaǵy baǵasy barreline 50 men 47 dollar arasynda bolady. «Ótken aptada munai baǵasy Federaldy rezerv júiesiniń otyrysynyń hattamasy men naryqtaǵy munai qorynyń kóbeiýine qaramastan, salystyrmaly túrde, joǵary shamada bekitildi», – deidi sarapshy.
Degenmen, Kanada munaily qumdarynyń mańynda bolǵan órtten soń munaidy qaita óndire bastaǵanynyń áserinen qara altynnyń quny turaqsyzdanady. Onyń ústine Iran da bir kúnde alatyn munai qorynyń kólemin 4 mln barrelge deiin arttyryp jatyr. Dollarǵa qatysty teńge quny barrel baǵasyna tikelei bailanysty ekenin eskersek, munai qorynyń úzdiksiz ulǵaiýynan ulttyq valiýta birshama álsireýi múmkin.
Al «FINAM» investitsiialyq holdinginiń sarapshysy Bogdan Zvarich «munai óńdeýshiler naryqqa óz ónimin barreline 50 dollarǵa kirgizýge tyrysyp jatyr», – deidi. Mamannyń aitýynsha, barlyǵy da AQSh-tyń naryqqa qansha munai qoryn kirgizetinine tikelei bailanysty. Osy tusta aita keteiik, aldyńǵy aptada Soltústik Amerika men Afrikadaǵy munai óndirýshiler munai baǵasyn barreline 50 dollarǵa kóterip jibergen bolatyn. Alaida irandyq qara altyn qorynyń qaita artýynyń áserinen baǵa barreline 48 dollarǵa qaita turaqtady.
Ózge elder óndiretin munaidyń kólemin arttyrǵanymen, «Goldman Sachs» investitsiialyq banki birneshe faktor áserinen kúnine 71 myń barrelge deiin munai tapshylyǵy týyndaidy dep boljaidy. Oǵan Nigeriiadaǵy radikaldy toptardyń munai tasymaldaýǵa kedergi keltiretin jii shabýyly, italiialyq Val D’Agri kenishindegi jóndeý jumystary, Braziliiadaǵy Barrakýda, Karatinga platformalaryndaǵy órt, Baǵdadtyń Túrkiiaǵa demarshy men kolýmbiialyq Kano-Limon – Kovenias munai qubyryndaǵy terakti siiaqty faktorlar naryqtaǵy munai qorynyń azaiýyna tikelei áser etip otyr.
Atalǵan jaittardy eskergen Qatardyń energetika ministri, OPEK-tiń qazirgi basshysy Mýhammed ben Saleh as-Sada «barreline 65 dollar – ádiletti baǵa» dep sanaidy. «Associated Press» basylymyna bergen suhbatynda ministr munaiǵa suranysty jasandy azaitý arqyly osyndai kórsetkishke qol jetkizýge bolatynyn aitty. Endi 2 maýsym kúni OPEK-ke kirmeitin eldermen bolatyn kezdesýde óndiriletin munai qoryn tómendetý jaily mámilege kelmese, teńgeniń dollarǵa qatysty quny ary qarai da quldyrai bermek. Sonymen qatar, ulttyq valiýta quny quldyraidy dep «Samuryq-Qazyna» ulttyq ál-aýqat qory da boljap otyr. Qordyń Zertteýler men maǵlumattardy basqarý departamentiniń ashyq esebinde «2016 jyly turaqtalady bir dollar quny 355 teńge shamasynda turaqtalady» deidi.
Aian QALMURAT, “7”
