QR Bilim jáne ǵylym ministrligi doktoranttardyń dissertatsiia taqyrybyn oqýdyń birinshi semestrinde bekitýi týraly erejeni ózgertýdi usyndy. Bul týraly ministr Ashat Aimaǵambetov Facebook jelisinde jazdy, dep habarlaidy "Ult aqparat".
«Jaqynda doktoranttar ózge stýdentter siiaqty jańa oqý jylyn bastaidy. Qazirgi normativtik aktilerge sáikes, doktoranttar dissertatsiia taqyrybyn oqýdyń birinshi semestrinde bekitýi kerek. Is júzinde bul únemi derlik resmi sipatta bolady. Doktorant pen onyń jetekshisi dissertatsiia taqyrybyn bekitý merzimin onyń pysyqtalýyna qarai ózderi belgileýi tiis. Bilim men ǵylymda resmi tásil bolmaýy kerek! Bul doktoranttardyń Jeke oqý josparyn (JOJ) bekitý merzimderine de qatysty. BǴM mundai qujattardyń merzimderi men mazmunyn rettemeýi tiis. Biz JOO-lardaǵy esep berýdi azaitý úshin odan ári jumys isteimiz», - dep jazdy ministr Facebook-tegi paraqshasynda.
Sonymen birge, ministr ortasha bilim berýdegi oqý jetistikterin syrttai baǵalaýdy (OB OJSB) joiýdy usyndy.
«Baqylaýdyń bul túri eshqashan tiimdi bolmaǵan. Akademiialyq derbestikti keńeitý jaǵdaiynda árbir JOO óziniń bilim berý baǵdarlamalaryn daiyndaǵanda OJSB is júzinde qajet bolmai qalady», - deidi A. Aimaǵambetov.
