قر بٸلٸم جەنە عىلىم مينيسترلٸگٸ دوكتورانتتاردىڭ ديسسەرتاتسييا تاقىرىبىن وقۋدىڭ بٸرٸنشٸ سەمەسترٸندە بەكٸتۋٸ تۋرالى ەرەجەنٸ ٶزگەرتۋدٸ ۇسىندى. بۇل تۋرالى مينيستر اسحات ايماعامبەتوۆ Facebook جەلٸسٸندە جازدى, دەپ حابارلايدى "ۇلت اقپارات".
«جاقىندا دوكتورانتتار ٶزگە ستۋدەنتتەر سيياقتى جاڭا وقۋ جىلىن باستايدى. قازٸرگٸ نورماتيۆتٸك اكتٸلەرگە سەيكەس, دوكتورانتتار ديسسەرتاتسييا تاقىرىبىن وقۋدىڭ بٸرٸنشٸ سەمەسترٸندە بەكٸتۋٸ كەرەك. ٸس جٷزٸندە بۇل ٷنەمٸ دەرلٸك رەسمي سيپاتتا بولادى. دوكتورانت پەن ونىڭ جەتەكشٸسٸ ديسسەرتاتسييا تاقىرىبىن بەكٸتۋ مەرزٸمٸن ونىڭ پىسىقتالۋىنا قاراي ٶزدەرٸ بەلگٸلەۋٸ تيٸس. بٸلٸم مەن عىلىمدا رەسمي تەسٸل بولماۋى كەرەك! بۇل دوكتورانتتاردىڭ جەكە وقۋ جوسپارىن (جوج) بەكٸتۋ مەرزٸمدەرٸنە دە قاتىستى. بعم مۇنداي قۇجاتتاردىڭ مەرزٸمدەرٸ مەن مازمۇنىن رەتتەمەۋٸ تيٸس. بٸز جوو-لارداعى ەسەپ بەرۋدٸ ازايتۋ ٷشٸن ودان ەرٸ جۇمىس ٸستەيمٸز», - دەپ جازدى مينيستر Facebook-تەگٸ پاراقشاسىندا.
سونىمەن بٸرگە, مينيستر ورتاشا بٸلٸم بەرۋدەگٸ وقۋ جەتٸستٸكتەرٸن سىرتتاي باعالاۋدى (وب وجسب) جويۋدى ۇسىندى.
«باقىلاۋدىڭ بۇل تٷرٸ ەشقاشان تيٸمدٸ بولماعان. اكادەمييالىق دەربەستٸكتٸ كەڭەيتۋ جاعدايىندا ەربٸر جوو ٶزٸنٸڭ بٸلٸم بەرۋ باعدارلامالارىن دايىنداعاندا وجسب ٸس جٷزٸندە قاجەت بولماي قالادى», - دەيدٸ ا. ايماعامبەتوۆ.
