Túrkistan oblystyq týberkýlezge qarsy dispanseriniń bas dárigeri Bolat Saǵymbekov koronavirýstan kóz jumǵan dárigerlerdi eske alý aktsiiasyna qatysty pikir bildirdi, dep habarlaidy "Ult aqparat".
Áleýmettik jelide Prezident jariialaǵan jalpyulttyq aza tutý kúni koronavirýs qurbandaryn eske alýǵa arnalǵan dárigerlerdiń kóshedegi únsizdik aktsiiasy keńinen taralyp jatyr. Bul is-áreketti synǵa alyp jatqandar da joq emes.
«Osy oraida Shymkent qalasynda ornalasqan Túrkistan oblystyq týberkýlezge qarsy dispanseri ujymynyń atynan resmi túrde málimdeimin: atalmysh shara - Ulttyq meditsina qaýymdastyǵynyń tóraiymy Aijan Begaidarqyzy Sadyqovanyń barsha meditsina qyzmetkerlerine tastaǵan úndeýin qoldaý maqsatynda, sum indetpen kúresip kóz jumǵan barsha áriptesterimizdiń rýhyna taǵzym etý úshin jasaǵan bizdiń ortaq sheshimimiz» deidi Túrkistan oblystyq týberkýlezge qarsy dispanseriniń bas dárigeri Bolat Saǵymbekov.
Onyń aitýynsha, dárigerler qaýymy aty jaman aýrýmen arpalysyp júrip qaitys bolǵan qanshama mamannan, áriptes-dostan, qyzmettes joldastarynan aiyrylǵan.
«Olar kóz aldymyzdan ketse de, júregimizde qaldy. Sondyqtan da, aza tutý kúni olardyń rýhyna taǵzym etip, eske alýdy ózimizdiń áriptestik paryzymyz dep bilemiz. Olardyń árbiri osyndai qurmetke laiyq dep sanaimyz. Óz kezegimde, bul sharany uiymdastyrýǵa jergilikti ákimdiktiń de, ortalyq bilik oryndarynyń da eshqandai qatysy joq ekenin jetkizemin» dep túiindedi sózin Túrkistan oblystyq týberkýlezge qarsy dispanseriniń bas dárigeri.
