Qazaqstanda psihologtardyń qyzmetin retteitin jańa zań qabyldanýǵa jaqyn. Senat maquldaǵan zań jobasyna sáikes, endi arnaiy bilimi joq azamattar ózin "psiholog" dep tanystyryp, kásibi qyzmet kórsete almaidy, dep habarlaidy ult.kz.
Zań jobasy psihologiialyq kómektiń sapasyn arttyrýǵa, azamattardyń quqyqtaryn qorǵaýǵa jáne saladaǵy biryńǵai talaptardy qalyptastyrýǵa baǵyttalǵan.
Senat depýtaty Ásem Rahmetovanyń aitýynsha, qujat psihologtardyń kásibi daiarlyǵyna qoiylatyn talaptardy kúsheitedi. Atap aitqanda, kásiptik standart engizilip, mamandardyń bilimine, kásibi quzyretteri men biliktiligine naqty talaptar belgilenedi. Sonymen qatar psihologtardyń Ádep kodeksi bekitilip, kásibi jaýapkershilik pen qupiialylyq qaǵidattaryn saqtaý mindetteledi.
Zań jobasynda psihologtardyń memlekettik tizilimin qurý da qarastyrylǵan. Eńbek jáne halyqty áleýmettik qorǵaý birinshi vitse-ministri Erbol Tuiaqbaevtyń aitýynsha, bul tizilimge joǵary bilimi jáne halyqaralyq sertifikaty bar mamandar ǵana engiziledi.
Eger psihologtyń qyzmetine qatysty negizdi shaǵymdar túsip, sapasyz qyzmet kórsetkeni nemese kásibi talaptardy buzǵany anyqtalsa, ol memlekettik tizilimnen shyǵarylady. Sondai-aq kez kelgen azamat arnaiy reestr arqyly mamannyń bilimi, biliktiligi men eńbek ótili týraly málimetti teksere alady.
Qujatta psihologtardyń kásibi qupiiany saqtamaýy nemese óz mindetin tiisti deńgeide oryndamaýy jaýapkershilikke ákeletini de kózdelgen. Zań buzýshylyqtyń saldaryna qarai maman ákimshilik nemese qylmystyq jaýapkershilikke tartylýy múmkin.
Zań jobasy endi Memleket basshysynyń qol qoiýyna jiberiledi.
