Parlament Senatynyń depýtattary Aqmola oblysynyń Shortandy aýdanynda bolyp, jergilikti turǵyndarmen jáne jergilikti bilik ókilderimen kezdesti, sharýa qojalyqtaryn aralap kórdi, dep habarlaidy "Ult aqparat".
Palatanyń baspasóz qyzmetinen málim etkendei, senatorlar aýyldaǵy naqty jaǵdai men ózekti máselelerge, sondai-aq aýyldyq aýmaqtardy qoldaý men damytýǵa arnalǵan memlekettik baǵdarlamalardyń oryndalý sapasyna nazar aýdardy. Senattyń Agrarlyq máseleler, tabiǵatty paidalaný jáne aýyldyq aýmaqtardy damytý komitetiniń sapary 2020 jylǵy 23 qazanda ótetin parlamenttik tyńdaýǵa daiyndyq aiasynda jasalǵan.
«Senatorlarǵa kelgen aqparat boiynsha aýyl turǵyndary qalalarǵa qonys aýdarýda. Depýtattar sondai-aq aýyl mektepteri men dárigerlik mekemelerdiń jai-kúiine nazar aýdardy. Respýblika boiynsha olardyń keibiri kúrdeli jóndeýdi nemese jańa ǵimarattar salýdy qajet etedi. Aýyl turǵyndary senatorlarmen júzdesýlerde aýyldaǵy jumyspen qamtý taqyrybyn qozǵady. Sonymen qatar, sharýa qojalyqtarynyń basshylary bilikti jas mamandardyń jetispeitinin tilge tiek etti», - delingen taratylǵan aqparatta.
«Aýylǵa joǵary bilimdi jas mamandardy tartýda kóptegen problema bar. Bizde «Diplommen – aýylǵa« baǵdarlamasy óte jaqsy. Biraq, ókinishke orai, bul baǵdarlamanyń oryndalý sapasy tómen», - dedi senator Aqylbek Kúrishbaev.
Parlamentshiler agrarlyq joǵary oqý oryndaryn bitirgen jas mamandardyń 100% tek 30% ǵana aýylǵa oralatynyn atap ótti. Elimizdiń kóptegen aýyldarynda osyǵan uqsas jaǵdai qalyptasyp otyr. Biraq «Aýyl - El besigi» baǵdarlamasynyń arqasynda aýyldyq eldi mekender jandana bastady - áleýmettik nysandar qalpyna keltirilýde jáne jańa jumys oryndary ashylýda.Sondyqtan aýyl turǵyndary osy baǵdarlamanyń odan ári júzege asyrylýyna úmittenip otyr.
