Diplom tapsyrý rásimi kezinde qujatty jurt aldynda jyrtyp tastaǵan stýdenttiń áreketi áleýmettik jelide úlken rezonans týdyrdy. Oqiǵaǵa qatysty ICB kolledji resmi málimdeme jasap, túlektiń túsiniktemesin jariialady, dep habarlaidy ult.kz.
Stýdent kópshiliktiń synyna sebep bolǵan áreketi úshin ustazdarynan jáne bilim berý uiymdarynan keshirim suraǵan.
«Áleýmettik jelilerde taralǵan video úshin muǵalimderimnen, bilim berý uiymdarynan keshirim suraimyn», – delingen málimdemede.
Túlek diplomnyń túpnusqasyna zaqym kelmegenin túsindirdi. Onyń aitýynsha, sahnada jyrtylǵan qujat — aldyn ala daiyndalǵan kóshirme ǵana.
«Diplomnyń túpnusqasy jyrtylǵan joq. Aldyn ala daiyndap ákelgen kók qaǵazdy jyrttym. Bul áreketimmen eshkimdi renjitkim nemese bilimniń qadirin túsirgim kelgen joq. Qoǵamda mundai pikir qalyptasady dep oilamadym», – dedi stýdent.
Ol bolǵan jaǵdaiǵa ókinish bildirip, mundai áreketti endi qaitalamaitynyn jetkizdi.
Oqiǵaǵa deiin áleýmettik jelide taraǵan videoda túlektiń sahnaǵa shyǵyp, diplom alǵannan keiin ony kópshiliktiń kózinshe jyrtyp jatqan sáti kórsetilgen edi. Beinejazba qysqa ýaqytta tarap, qoǵamda qyzý pikirtalas týǵyzdy.
Kóptegen qoldanýshylar stýdenttiń qylyǵyn bilimge, oqytýshylardyń eńbegine jáne oqý ornyna degen qurmetsizdik dep baǵalady. Keibireýler onyń áreketine birden baǵa bermei, mundai qadamǵa ne sebep bolǵanyn anyqtaý kerek ekenin aitty.
Al keibir jeli qoldanýshylary videoda jyrtylǵan zat diplomnyń ózi emes, tek muqabasy nemese kóshirme bolýy múmkin ekenin boljady. Degenmen, birqatar pikir qaldyrýshylar bul áreketti nazar aýdarýǵa baǵyttalǵan qadam dep synady.
Kolledj málimdemeden keiin áleýmettik jelidegi pikir jazý múmkindigin shektedi.
