Foto: Aikyn.kz
San ǵasyrdan beri musylmandyq joldy ustanǵan babalarymyz ana tilimizdegi sózderdi qoldanǵan. Bul týraly elordada ótken baspasóz máslihatynda Bas múfti Naýryzbai qajy Taǵanuly málim etti, dep habarlaidy Ult.kz QazAqparatqa silteme jasap.
"Osy rette jastardy dini terminderdi qazaqsha aitýǵa shaqyramyn. Ókinishke qarai, keibir jas býyn ókilderiniń aýyzashardy - iftar, sáresin - sýhýr dep aityp júrgeni kóńilge qaiaý túsiredi. San ǵasyrdan beri musylmandyq joldy ustanǵan ata-babalarymyz aýyzashar, sáresi degen sózderdi qoldanǵan. Biz de babalar jolyn ustanǵan urpaq retinde ózge tilden engen dini terminderden barynsha aýlaq bolyp, ózimizdiń ata-babamyzdan qalǵan jaqsy sózderdi qoldanyp, ózimizdiń ana tilimizge qurmet kórsetip, qazaqsha sóileýge tyrysaiyq, - dedi Naýryzbai qajy Taǵanuly.
Qazaqstan musylmandary dini basqarmasy ortaq pátýaǵa sáikes, qasietti Ramazan aiy 1 naýryzda bastalatynyn habarlap otyr. Naýryz aiynyń 26-nan 27-ne qaraǵan tún — Qadir túni, al 30 naýryz — Oraza ait merekesi.
Elimizdiń Bas múftii Naýryzbai qajy Taǵanulynyń tóraǵalyǵymen ótken Qazaqstan musylmandary dini basqarmasynyń tóralqa májilisinde pitir sadaqasy elimiz boiynsha eki keli unnyń ortasha baǵasy negizinde 655 teńge bolyp bekitildi.
