Óz-ózine qol jumsaǵandardy bir zirattyń ishinde bólek jerleýge Qazaqstan musylmandary dini basqarmasy kelisim bermeidi. Bul másele sol eldi mekenniń jergilikti turǵyndary, onyń ishinde aqsaqaldar alqasynyń uiǵarymy arqyly sheshiledi. Sputnik Qazaqstan agenttigi joldaǵan saýalǵa múftiiat osylai dep jaýap berdi.
Buǵan deiin Aqmola oblysy Kókshetaý qalasyna qarasty Krasnyi Iar eldi mekeninde sýitsid jasaǵandar bólek jerlenetinin habarlaǵan edik. Mundai bastamany Krasnyi Iar meshitiniń bas imamy Naýan Mútáluly kótergen. Atalǵan aýylda óz-ózine qol jumsaǵandar 2010 jyldan beri bólek jerlenedi eken. Biz Qazaqstan musylmandary dini basqarmasynan munyń qanshalyqty durys ekenin jáne mundai másele múftiiatpen kelisile me, joq pa sony suraǵan edik.
"Jalpy, shariǵatta ózine-ózi qol jumsaýǵa qatań tyiym salynady. Bul – kisi óltirgennen de aýyr kúná. Alaida adamnyń boiyndaǵy rýhani, imani álsizdik pendeni osyndai jaman jolǵa itermeleidi. Atalǵan eldi mekendegi bólek jerleý máselesiniń astarynda da osy shariǵat talaptary jatyr. Biraq bizdiń búgingi qoǵamymyz buǵan daiyn ba degen saýal týatyny anyq. Jaqyny ómirden ótip jatqanda "bul ózine-ózi qol jumsady" dep olardan teris ainalyp ketýge bola ma?! Sondyqtan, ondai ólimniń aýyr ekenin túsinýimiz kerek. Bir zirattyń ishinde bólek jerleý máselesin úlkender kótergendikten, biz olarǵa qarsy shyǵa almaimyz. Ólgen adamdy qaida, qalai jerleidi, ony marqumnyń eń jaqyndary sheshetin másele. Sondyqtan, ózine qol jumsaǵandardy bir zirattyń ishinde bólek jerleý jergilikti turǵyndarmen, onyń ishinde aqsaqaldar alqasynyń uiǵarymymen sheshilgendikten, múftiiat buǵan esh aralasa almaidy", — dedi QMDB-nyń Aqmola oblysy boiynsha ókil imamy Qýanysh Sábit.
Imamnyń aqparatynsha, sýitsid jasaǵandar tek Krasnyi Iar eldi mekeninde ǵana emes, Aqmola oblysynyń birqatar aýylynda bólek jerlenedi.
"Mundai bólek jerleý rásimderi Aqmola oblysynyń Zerendi aýdanyna qarasty birqatar aýylda jolǵa qoiylǵan. Bul bastamanyń árisi on jyl, berisi bes-alty jyldan jalǵasyp kele jatqanyn da aitar edik. Iaǵni, bul jaidyń tárbielik jaǵy mańyzdyraq siiaqty. Osy eldi mekenderde ózine-ózi qol jumsaý oqiǵalary azaiǵany da buǵan aiqyn mysal bola alady", — deidi ol.
Aitýynsha, sýitsid ólimi jóninen Qazaqstan, ókinishke qarai, aldyńǵy oryndardyń birinde tur. Sondyqtan halyqtyń sanasyn oiatyp, ózine qol jumsaý aýyr kúná ekenin jetkizý asa mańyzdy.
"Din – óte názik nárse, onyń ishki shariǵi talaptaryn alǵa tartyp, oǵan eldi qarsy baǵyttaý jaqsylyqqa aparmaidy. Qazaq eli zaiyrly memleket ekenin de esten shyǵarmaǵan jón. Biraq, túptiń túbinde halyqtyń dini sanasy artyp, mundai máseleler óz oraiymen sheshiletin bolady", — delingen jaýapta.
