Qazaqstan musylmandary dini basqarmasy biyl Oraza ait 5 maýsymǵa túsip turǵanyn aitty, dep habarlaidy "Ult aqparat".
Oraza ait ramazan aiynan keiingi sháýýál aiynyń birinshi kúnine sáikes keledi. Jańa aidyń bastalýy shariǵi úkimder men astronomiialyq esepter negizinde júzege asady. Paiǵambarymyz (oǵan Allanyń salaýaty men sálemi bolsyn):
"Jańa aidy kórip oraza tutyńdar, jańa aidy kórip, aýyzdaryńdy ashyńdar", - degen.
2019 jyldyń 11 sáýirinde Nur-Sultan qalasynda ótken basqosýda Qazaqstan, Ózbekstan jáne Qyrǵyzstan elderiniń musylmandary dini basqarmasynyń Shariǵat jáne pátýa bólimderiniń basshylary jańa aidyń týýyn halyqaralyq astranomiialyq zertteý ortalyqtarynyń ádistemesi negizinde belgileýge biraýyzdan kelisti. Sondai-aq oǵan 4 sharttyń tabylýy aityldy. Olar:
- Ai jańasy 15 saǵat 33 minýt jalǵasady;
- Ai men kúnniń batý aralyǵy eń azy 29 minýt;
- Aidyń kúnnen uzartý buryshy (elongation) 7,7 gradýs;
- Aidyń gorizonttan biiktigi (altitude) 5 gradýsty quraidy.
Osy sharttar tabylǵan jaǵdaida jańa ai bastalǵan bolyp sanalady.
Sonymen qatar, Qazaqstanda belgili V.G.Fesenkov atyndaǵy astrofizika institýtynyń málimeti boiynsha, jańa aidyń kórinýi 4 maýsymǵa týra keledi, bul kúni aidyń batýy kún batqannan keiin 1 saǵattan keiin bolady.
Osyǵan orai, biyl 2019 jyly Qazaqstanda oraza ait kúni 5 maýsymǵa sáikes kelip tur.
