Aqparat jáne qoǵamdyq damý vitse-ministri Marat Ázilhanov elimizdegi din salasynda áielder uiymynyń kózge túserlik jumysy baiqalmai otyrǵanyn málim etti, dep habarlaidy QazAqparat tilshisi.
«Jalpy, bizdiń elimizde otbasylyq, genderlik máselelermen ainalysatyn 77 úkimettik emes uiym bar eken. Biraq, kóz júgirtsek, birde-bireýi din salasyna asa atsalysyp jatqan joq sekildi. Oblystarda olarǵa 235 mln teńge bólinedi eken. 126 joba iske asyrylyp jatyr. Bizdiń ortalyqta da otbasylyq qundylyqtarǵa bailanysty deńgeide de birneshe joba bar. Al biraq, onyń aitarlyqtai kózge túserlik jumysyn, áserin de kórip otyrǵan joqpyz. Bizdiń maqsatymyz - dini radikalizmniń aldyn alý. Bul salada elimizde qordalanǵan máseleler kóp. Onyń ishinde mysaly keshegi «Jýsan» operatsiiasymen elge kelgen 150 áieldiń taǵdyry. Ol kisiler – júregi jaralanǵan azamattar. Kóbisi eriksiz ketken», - dedi Marat Ázilhanov elordada ótip jatqan «Jastardy rýhani, adamgershilik tárbieleýdegi jáne radikaldy dini ideologiiaǵa immýnitetti qalyptastyrýdaǵy áielder uiymdarynyń róli» atty respýblikalyq ǵylymi-praktikalyq konferentsiiada.
Vitse-ministrdiń aitýynsha, Siriiadan kelgen áieldermen jumys júrgizý kerek.
«Negizi ózimizdiń aramyzdan áielder uiymdary jumys istese deimiz. Odan qaldy sol jaqta qaza tapqan er kisilerdiń otbasylary, balalary men áielderi bar. Ártúrli jaǵdaimen abaqtyǵa túskenderdiń otbasylary men áielderi bar. Odan qaldy bizdiń óńirlerde áielder jamaǵaty baryn jasyrýdyń keregi joq. Ol da durys shyǵar. Eshqandai renjitin sóz emes shyǵar – áielder ózderi birigip, jamaǵat bolyp jatyr. Ol da belgili jai. 5 myńǵa jýyq sondai kisiler bar elde. Alaida kóp jerde olar jabyq túrde bir-birimen aralasady. Syrtpen bailanysy joq. Ózderimen ózderi júredi. Qiyndyqtary bar. Jumys tappai, balalaryn balabaqshaǵa ornalastyra almaidy. Olarmen de jumys júrgizý kerek. Jalpy, qoǵamǵa din salasyndaǵy bar qaýip-qaterlerdi menińshe, áielden artyq eshkim jetkize almaityn siiaqty», - dedi Marat Ázilhanov.
