Aqtóbe oblysynyń basshylyǵy jańadan salynyp jatqan mýzeide tanymal adamdardyń jeke zattaryn qoiýdy josparlap otyr. Sonyń ishinde jas ánshi Dimash Qudaibergenniń sahnalyq kostiýmderi, sondai-aq Qytaidaǵy fanattary tartý etken syilyqtary men jazǵan hattary bolýy ábden múmkin, dep habarlaidy "Ult aqparat" Aktobenews.kz saityna silteme jasap.
Dimashtyń anasy Svetlana Aitbaevanyń aitýynsha, atalǵan bastama qoldaý tabatyn bolsa, ónerli otbasy múmkindiginshe mýzeige kómektesýge daiyn. «Osyǵan deiin Embi qalasyndaǵy Jubanovtar mýzeiiniń direktory sahnalyq kiimderimizdi suratqanda Qanat ekeýmizdiń kostiýmderimizdi bergen bolatynbyz. Osy joly jańa mýzei tarapynan usynys tússe, árine, berer edik. Tipti, keshegide Dimashtyń Qytai sahnasynda kigen kiimderin de tartý etemiz», - deidi Svetlana Aitbaeva.
Sonymen birge, Svetlana Aitbaeva Qytai fanattarynyń Dimashqa tartý etken erekshe syilyqtardy da Qazaqstanǵa jetkizýge tyrysqanyn aitady. «Qytai fanattary hattar jazǵan. Oiynshyqtar, albomdar syilady. Shamam kelgenshe Qazaqstanǵa ákeldim. Búginde úlken qorapqa salyp jinap qoidym. Eger mýzeiden oryn tabylsa, árine, keibir dúnielerdi eksponat retinde berýge daiynbyz», - deidi ol.
Aita keteiik, buǵan deiin Dimash Qudaibergenniń «Singer2017» án baiqaýynyń birinshi kezeńinde kigen sahnalyq kiimi 158 890 iýanǵa (7,2 million teńge) satylǵan bolatyn. Kostiým mpaimai.jd.com ǵalamtor saýda jelisinde aýktsionǵa shyǵarylǵan. Bastapqy baǵasy 188 iýannan (8 500 teńge) bastalǵan kiim sońynda 158 890 iýanǵa satylyp kekten. Sol kezde jeńimpazǵa Iphone 6S telefony syiǵa tartylǵan edi.
