اقتٶبە وبلىسىنىڭ باسشىلىعى جاڭادان سالىنىپ جاتقان مۋزەيدە تانىمال ادامداردىڭ جەكە زاتتارىن قويۋدى جوسپارلاپ وتىر. سونىڭ ٸشٸندە جاس ەنشٸ ديماش قۇدايبەرگەننٸڭ ساحنالىق كوستيۋمدەرٸ, سونداي-اق قىتايداعى فاناتتارى تارتۋ ەتكەن سىيلىقتارى مەن جازعان حاتتارى بولۋى ەبدەن مٷمكٸن, دەپ حابارلايدى "ۇلت اقپارات" Aktobenews.kz سايتىنا سٸلتەمە جاساپ.
ديماشتىڭ اناسى سۆەتلانا ايتباەۆانىڭ ايتۋىنشا, اتالعان باستاما قولداۋ تاباتىن بولسا, ٶنەرلٸ وتباسى مٷمكٸندٸگٸنشە مۋزەيگە كٶمەكتەسۋگە دايىن. «وسىعان دەيٸن ەمبٸ قالاسىنداعى جۇبانوۆتار مۋزەيٸنٸڭ ديرەكتورى ساحنالىق كيٸمدەرٸمٸزدٸ سۇراتقاندا قانات ەكەۋمٸزدٸڭ كوستيۋمدەرٸمٸزدٸ بەرگەن بولاتىنبىز. وسى جولى جاڭا مۋزەي تاراپىنان ۇسىنىس تٷسسە, ەرينە, بەرەر ەدٸك. تٸپتٸ, كەشەگٸدە ديماشتىڭ قىتاي ساحناسىندا كيگەن كيٸمدەرٸن دە تارتۋ ەتەمٸز», - دەيدٸ سۆەتلانا ايتباەۆا.
سونىمەن بٸرگە, سۆەتلانا ايتباەۆا قىتاي فاناتتارىنىڭ ديماشقا تارتۋ ەتكەن ەرەكشە سىيلىقتاردى دا قازاقستانعا جەتكٸزۋگە تىرىسقانىن ايتادى. «قىتاي فاناتتارى حاتتار جازعان. ويىنشىقتار, البومدار سىيلادى. شامام كەلگەنشە قازاقستانعا ەكەلدٸم. بٷگٸندە ٷلكەن قوراپقا سالىپ جيناپ قويدىم. ەگەر مۋزەيدەن ورىن تابىلسا, ەرينە, كەيبٸر دٷنيەلەردٸ ەكسپونات رەتٸندە بەرۋگە دايىنبىز», - دەيدٸ ول.
ايتا كەتەيٸك, بۇعان دەيٸن ديماش قۇدايبەرگەننٸڭ «Singer2017» ەن بايقاۋىنىڭ بٸرٸنشٸ كەزەڭٸندە كيگەن ساحنالىق كيٸمٸ 158 890 يۋانعا (7,2 ميلليون تەڭگە) ساتىلعان بولاتىن. كوستيۋم mpaimai.jd.com عالامتور ساۋدا جەلٸسٸندە اۋكتسيونعا شىعارىلعان. باستاپقى باعاسى 188 يۋاننان (8 500 تەڭگە) باستالعان كيٸم سوڭىندا 158 890 يۋانعا ساتىلىپ كەكتەن. سول كەزدە جەڭٸمپازعا Iphone 6S تەلەفونى سىيعا تارتىلعان ەدٸ.
