Qazaqstandyq tanymal ánshi Dimash Qudaibergenniń shyǵarmashylyǵyna arnalǵan sýret baiqaýy jariialandy, dep habarlaidy "Ult aqparat" qalalyq mádeniet jáne sport basqarmasyna silteme jasap.
Úzdik sýret týyndylary 26 maýsym - 26 shilde aralyǵynda «Máńgilik el» qaqpasyndaǵy Zamanaýi óner galereiasyna qoiylady. Olardy kórme kelýshileri men Dimash Qudaibergenovtiń fanattary satyp ala alady.
«Baiqaýǵa kartinalar, músinder, kesteler men Dimash Qudaibergenniń basqa da tehnikalarda oryndalǵan sýretteri qabyldanady. Onda kásipqoi jáne áýesqoi sýretshiler, stýdentter, sándik-qoldanbaly óner sheberleri jáne kez kelgen adam qatysa alady. Qatysýshylarǵa esh shekteý qoiylmaidy. Kórmege qatysýǵa ótinimder men týyndylardyń fotosýretteri 5-20 maýsym aralyǵynda triumf.arka@mail.ru elektrondy mekenjaiyna joldanýy tiis», - delingen basqarmanyń resmi habarlamasynda.
Kórmege kirý úshin «Máńgilik el» qaqpasyna bilet satyp alý kerek: eresekter úshin - 500 tg., balalar úshin - 350 (7 jasqa deiingi balalarǵa tegin), stýdentter men jeńildigi bar sanattaǵy azamattarǵa - 250 tg.
Eske salaiyq, Dimash Qudaibergenovtiń jeke kontserti 29 maýsymda «Astana Arena» stadionynda ótedi. Dimashtyń «Arnaý» atty shoý baǵdarlamasy Elorda kúnine arnalady. Kontsertke álemniń 15 memleketinen Dimashtyń fanattary keledi.
