Dimash Qudaibergenniń Aqtóbege kelgen fanaty Rebekka mýzykalyq kolledj sahnasynda «Mahabat ber maǵan» ánin oryndady. Ánshiniń ustazy Marat Áitimov fanattyń tabiǵi talantyna tańqaldy, dep habarlaidy QazAqparat tilshisi.
Ánshi Dimash Qudaibergenniń «Arnaý» kontsertine kelgen bir top fanat Nur-Sultan, Almaty, Aqtóbe týrmarshrýtyn tańdaǵan. Olar bul úsh qalany aralaýǵa 4 myń AQSh dollaryn jumsady. Aqtóbege kelgen fanattar arasynda AQSh, Gavai araly, Mazaiziia, Ulybritaniia men Frantsiia sekildi Eýropanyń birneshe qalasynyń turǵyny bar. Olar ádettegidei meshit, shirkeý, mýzeige baryp, ánshi oqyǵan mektepte, mýzykalyq kolledjde boldy. Fanattar úshin ánshiniń ustazy Marat Áitimovpen suhbat qyzyqty ótti. Ári sahnada án aitýǵa múmkindik berilip, vokaldyq qabiletteri týraly bildi. Bárinen Gavai aralynan kelgen Rebekkanyń daýysy kópti tańqaldyrdy. Ol «Mahabbat ber maǵan» ánin mýzykalyq súiemeldeýsiz oryndap shyqty.
«Rebekkada tabiǵi talant bar. Tynys alýy jaqsy, iaǵni, adam sportpen shuǵyldanady. Sportpen shuǵyldanatyn adam joǵary notalardy almasa da qinalmai jaqsy án aita alady. Mýzykany esti alady, qubyltady. Án taza shyqty. Sahnada sál qobaljyǵany baiqalady», - dedi ánshiniń ustazy Marat Áitimov. Al fanat Rebekka taǵy Aqtóbege kelse Marat Áitimovten sabaq alatyn boldy.
Buǵan deiin habarlaǵanymyzdai, 25-maýsymda bir top fanat Aqtóbege kelip, qalanyń kórikti jerlerin aralaǵan bolatyn.
Fanattar úshin Dimash Qudaibergenniń balalyq shaǵy, stýdenttik kezi qyzyqty. Olar Marat Áitimovten este qalar oqiǵalar týraly aityp berýin surady.
«Dimash mýzykalyq kolledjge kelgende 15 jasta boldy. Daýysy óńdelmegen, qarapaiym edi. Qazirgi daýysy oqýmen, eńbekpen keldi. Ol tórt jyl boiy tynbai daýysymen jumys istedi, jattyǵýlar jasady. Bastysy - talant. Án aitatyn, daýysy bar adamdar kóp. Al Dimashta tabiǵi talant ta, aqyl da bar. Bári toǵysqanda alapat kúshke ainaldy. Faltsetti mýzykalyq kolledjde kóp qoldanbaimyz. Dimash úshinshi kýrstan bastap áýestendi. Alǵashqy kezde tyiym saldym. Kóbine men kolledjde bolmaǵan kezde bar daýysymen, faltsetpen án aitady. Daýysy barlyq jerge estiledi. Meniń kirgenimdi bilgen kezde kózime túspeý úshin qashyp júredi. Ózine «judyryq» tietinin biledi», - dedi Marat Áitimov.
