Dimash Qudaibergenniń anasy Sveta Aitbaeva men mánerlep syrǵanaýdan halyqaralyq týrnirdiń júldegeri Daria Vdovina, Hokkeiden jastar komandasynyń kapitany Nikita Belashev Aqtóbedegi bas shyrshany jaqty, dep habarlaidy QazAqparat tilshisi.
Aqtóbe oblysy ákimdigi alańynda bas shyrsha jaǵyldy. Bul joly shyrsha shamdaryn QR eńbek sińirgen qairatkeri, ánshi Dimash Qudaibergenniń anasy Svetlana Aitbaeva, mánerlep syrǵanaýdan halyqaralyq týrnirdiń júldegeri Daria Vdovina, Hokkeiden jastar komandasynyń kapitany Nikita Belashev jaqty. Aqtóbe qalasy boiynsha bir kúnde tórt shyrsha jaǵylyp, halyqqa merekelik kóńil-kúi syilady. Sharaǵa oblys ákimi Berdibek Saparbaev pen qala turǵyndary qatysyp, teatrlandyrylǵan kórinisti tamashalady.
Oblys ákiminiń baspasóz qyzmetiniń habarlaýynsha, Aqtóbe oblysy ortalyǵynda 50-den astam shyrsha ornatyldy. Arbatta shaǵyn muz qalashyǵy bar. Sonymen qatar, Aqtóbe qalasynda 48 muz aidyny jumys istep tur. Jańa jyldyq erteńgilikter ár aýdan, aýylda uiymdastyrylyp, 80 myńnan astam balany qamtý josparda bar. Mereke qarsańynda aýyl sharýashylyǵy jármeńkesi de uiymdastyrylady.
