Búgin Dimash Qudaibergen Instagram paraqshasynda jankúierlerimen qaýyshyp, olardyń suraqtaryna jaýap berdi. QazAqparat álemge tanymal ánshiniń suhbatyn nazarlaryńyzǵa usynady.
- Jańa albomyńyz qashan jaryq kóredi?
- Jańa albom jazylý ústinde. Jaqynda tyńdarmandarǵa jol tartady dep úmittenemin. Albom jazý men úshin óte jaýapty, mańyzdy is. Jaibaraqat, asyǵys-úsigis albom shyǵarý - meniń tabiǵatyma jat dúnie. Sondyqtan ábden pisirip, oiymnan, júregimnen ótkizip baryp nazarlaryńyzǵa usynamyn. Karantin kezinde sizderdiń kózqarastaryńyz boiynsha bizdiń shyǵarmashylyq jumysymyz toqtap qalǵandai bolyp kórinýi múmkin, biraq biz úide daiyndalyp, jumys istep jatyrmyz.
- Kelesi kontsertińiz qashan bolady?
- Qazaqstanda eki jylda bir ret 2017 jáne 2019 jyly Arnau jáne Bastau dep atalatyn kontsertimdi tamashaladyńyzdar. Endigi kontsertim qashan, qai jyly bolatyny belgisiz. Ózim qalamaǵandyqtan emes, karantin siiaqty ártúrli sebep bolyp qalýy múmkin. Jolymdy kesip, aldyn ala aitpaiyn, onyń bári bolashaqtyń enshisinde.
- Ándi qalai shyǵarasyz? Shabyt qalai keledi?
- Men kompozitsiia boiynsha magistratýra bitirsem de, ózimdi kompozitor sanamaimyn. Keide áldebir áýen «kelip», ony diktofonǵa jazýǵa nemese notaǵa túsirýge asyǵamyn. Shabyt kóbinese ushaqta keledi nemese túnde oianyp, kontsertim qalai ótetinin kóz aldyma elestetip jatam. Sol kezde de shabyt kelip, án jazylýy múmkin. Adam balasy jaqsyǵa da, jamanǵa da, ataqqa da, halyq mahabbatyna da tez úirenedi. Meni ata-anamnyń qýanyshy shabyttandyrady. Olardyń júzindegi qýanyshty kórgen saiyn taǵy da qýantqym kelip turady. Meniń ár kontsertim, jeńisim, alǵan marapatym olar úshin úlken baqyt, úlken mereke. Anamnyń qýanyshtan aqqan kóz jasyn kórgen kezde kelesi joly qalai qýantarymdy oilap turamyn. Onyń osyndai kúiine men ómir boiy boi úirete almai ótetin siiaqtymyn.
- Ómirińizde bolǵan qyzyqty oqiǵany aityp bere alasyz ba?
- Men ózimdi joly bolǵysh adam sanaimyn. Soǵan dálel bola alatyn bir mysal: men basqa emes, dál osy otbasyda dúniege kelgenim úshin qýanamyn. Jasym 26-ǵa kelse de ata-anam aqyl aityp, tárbielep otyrady. Men ata-ana degende ata, ájemdi aityp otyrǵanymdy túsinetin shyǵarsyzdar. Qazaqtyń salt-dástúri boiynsha meni ómirge ákelgen ata-anam meni ata-ájemniń qolyna bergen, sondyqtan olardy da áke, ana dep atap kettim jáne kontsertterde de eki ata-anam bar ekenin aityp júremin. Sábidi ata-ájege berýdiń tárbielik máni zor, ol jas otbasy men ata-ene arasyn jaqyndatady, sonymen qatar ene men kelin arasynda diplomatiialyq qarym-qatynas deýge bolady. Taǵy bir qyzyqty jaǵdai: meni ómirge alyp kelgen ata-anam sahnada óner kórsetip bolǵan soń kórermen sahnaǵa shyǵyp, olardy quttyqtaityn. Men de ata-ájemmen birge kórermender qatarynda otyryp, kontsert aiaqtalǵan soń sahnaǵa shyǵyp, ortasynda turyp alyp, basymdy izep, rahmet aitatynmyn. Quddy bir kontsertti ákem, anam emes ózim berip tastaǵan siiaqtymyn. Bala kezimdegi osy sát meniń kóz aldymda qalyp qoidy.
Taǵy bir qyzyqty jaǵdai: ata-anamnyń aitýy boiynsha, eń alǵash 2 jasymda sahnaǵa shyǵyppyn. 10 sekýndtyq epizodqa qatysýym kerek bolǵan, iaǵni sahnanyń bir jaǵynan shyǵyp, ekinshi jaǵyna júgirip ótýim kerek eken. Men bolsam sahnanyń ortasynda toqtap, halyqqa kóz almai qarap qalyppyn. Olar qol shapalaqtaǵan kezde sahnadan tipten ketkim kelmei qalǵan eken. Sodan keiin uiymdastyrýshylar meni sahnadan alyp ketpek bolyp, men olarǵa ustatpai sahnany ainalyp qashqan ekenmin. Bul ata-anam aityp bergen jaǵdai.
- Bolashaqta qandai josparyńyz bar?
- Qazirgi jospar - keiinge shegerilgen kontsertterdi ótkizý. Jańa kontsert jumys kestesine enetin bolsa sizderge mindetti túrde habarlaityn bolamyz. Sizdermen qaýyshatyn sátti asyǵa kútip júremin.
- Kontsertten keiin qalai qalypqa kelesiz?
- Kóbinese únsizdikte bolamyn. Kontsert aldynda da jalǵyz qalýdy jaqsy kórem, ol týraly meniń tobymda jumys isteitinder jaqsy biledi.
- Ózge tilde án aitqanda sózderin túsinesiz be?
- Men aldymen mýzyka tilin túsinýge tyrysamyn. Obrazǵa kirip, mýzykanyń sulýlyǵyn sezinemin, odan keiin meniń sezingenim kórermenge jol tartady. Mýzykanyń óz tili, óz kúshi bar. Men qazaq, orys tilin jáne azdap aǵylshyn tilin bilemin. Ánshi bolý ońai dep oilaityndar qatelesedi. Mýzyka - ǵylym, kúrdeliligi jaǵynan matematikadan qiyn bolmasa, ońai emes. Men mýzykant retinde úirenerim kóp, mýzykanyń shegi joq.
- Alyp-qosaryńyz bar ma?
- Mundai baqytqa kenelgen mende arman joq shyǵar. Nazarlaryńyzǵa myń márte alǵys aitamyn, óitkeni meniń shyǵarmashylyǵymdy baǵalaý arqyly sizder meni ǵana emes, meniń ata-ájemdi qýantyp jatyrsyzdar. Men úshin odan asqan baqyt joq. Árqaisysyńyzdyń otbasyńyzǵa Alla taǵala baq-bereke bersin. Oraza ait qutty bolsyn!
