Ánshi Dimash Qudaibergen AQSh prezidenti Djo Baidenniń inaýgýratsiiasyn merekeleý aptalyǵynyń ashylý saltanatyna qatysady, dep habarlaidy dimashnews.com.
Dástúr boiynsha bul is-sharany Baýyrlas qalalar qaýymdastyǵy – «Sister Cities International» uiymy ótkizedi. AQSh-tyń jańadan sailanǵan prezidenti Djozef Baiden bul uiymnyń qurmetti teń tóraǵasy boldy. Sonymen qatar bul is-sharaǵa diplomatiialyq korpýs ta qatysady.
Koronavirýs pandemiiasyna bailanysty mereke 2021 jyldyń 17 qańtarynda saǵat 19:00-den 21:00-ge deiin (Nur-Sultan ýaqyty boiynsha saǵat 6:00-den 8:00-ge deiin) onlain rejimde ótedi.
Aita keterligi, Vashingtonda ornalasqan «Sister Cities International» halyqaralyq úkimettik emes uiymynyń negizin 1953 jyly AQSh-tyń 34-prezidenti Dýait Eizenhaýer qalaǵan.
Sol kezden beri AQSh prezidentteri Djon F. Kennedi, úlken Djordj Býsh, Bill Klinton, Barak Obama jáne Donald Tramp bul uiymnyń qurmetti teń tóraǵalary boldy.
70 jylǵa jýyq tarihynda «Sister Cities International» AQSh qalalary jáne onyń 130-dan asa memlekettegi baýyrlas qalalarynyń ózara árekettesýine bailanysty kóptegen is-sharany ótkizgen.
Osy jyly «Sister Cities International» segiz márte «Gremmi» júldegeri – ańyzǵa ainalǵan ánshi Daion Ýorvikke uzaq jyldar etken eńbegi úshin marapat usynady.
Sonymen qatar, Daion Ýorviktiń álemge «The Weeknd» retinde belgili úsh márte «Gremmi» júldegeri Abel Tesfaimen birlesip jumys istei bastaǵany belgili boldy.
«Sister Cities International» uiymynyń negizi qalanǵaly jáne AQSh pen Qazaqstannyń qarym-qatynasy tarihynda alǵash ret jańa sailanǵan AQSh prezidentiniń inaýgýratsiiasyn toilaý aptalyǵyn ashýshy is-sharaǵa qazaqstandyq ánshi – Dimash Qudaibergen qatysady.
«Sister Cities International» is-sharasynan bir kún buryn, 16 qańtarda qazaqstandyq oryndaýshynyń «DIMASH DIGITAL SHOW» atty alǵashqy onlain-kontserti ótkiziletinin de atap ótý kerek. Oǵan biletterdi myna siltemede satyp alýǵa bolady.
