Búgin qazaqtyń atyn aidai álemge tanytqan talantty ánshi, otandasymyz Dinmuhammed Qanatuly Qudaibergenniń týǵan kúni.
Dimash 1994 jyly Aqtóbede tanymal ánshiler, Qazaqstan Respýblikasynyń mádeniet qairatkerleri - Svetlana jáne Qanat Aitbaevtardyń shańyraǵynda dúnie esigin ashty. Dimashtyń ata-ájesi de ánge áýes, mýzykaǵa jaqyn adamdar. Biri dombyrada oinasa, ekinshisiniń án aitýǵa beiim.
Ánshi bala kúninen kieli sahnaǵa qumar bolǵan. 5 jasynan bastap fortepianoda oinaýdy úirenedi. Balalar horynda án aitady. Alty jasynda "Ainalaiyn" respýblikalyq baiqaýynyń "Fortepiano" nominatsiiasynda jeńimpaz atanady. Bul balǵyn bala shaǵynda baǵyndyrǵan bir biik belesi edi. Odan soń jas talant qiiandarǵa qanat qaǵady. Respýblikalyq, tipti halyqaralyq dodalarda eliniń atyn asqaqtatyp, álemge pash etýden talmaidy.
2010 jyly "Baiqońyrdyń ásem daýystary" halyqaralyq festivaliniń laýreaty atandy. 2012 jyly "Jas qanat" respýblikalyq jas án oryndaýshylar baiqaýynyń gran-priin jeńip alady. 2012 jyly "Vostochnyi bazar" halyqaralyq baiqaýynda taǵy da bas júldeni qanjyǵalady. Bir jyldan soń "Meikin Aziia" I halyqaralyq festivaliniń jeńimpazy atandy.
2014 jyly Dimash Aqtóbe qalasyndaǵy A.Jubanov atyndaǵy mýzykalyq kolledjiniń "Akademiialyq án oryndaý" fakýltetin bitirip, Qazaq ulttyq óner ýniversitetiniń "Estrada óneri" fakýltetine tústi. Bul kezde jas ánshini ónerge jaqyn jandar men ánshiler, óziniń jerlesteri ǵana jaqsy bilse kerek. Al jalpaq jurt áli Dimashty tolyq tanyp kete qoimaǵan. Ánshiniń esimi dúiim elge Vitebsk qalasynda ótken XXIV Halyqaralyq «Slavian bazary-2015» baiqaýynda gran-pridi jeńip alǵan soń máshhúr bola tústi. Al naǵyz tanymaldyqty oǵan Qytaida ótken «I am singer» jobasy syilady.
Kil myqtylar bas qosqan bul joba bastalysymen-aq Dimash maitalman mamandar nazaryna ilikti. Alǵashqy saiys kúni Daniel Balavýannyń "SOS d'un terrien en detresse" ánin óte joǵary deńgeide oryndap, kórermender kózaiymyna ainaldy. Tipti, joba mamandary "Táńir ózi nazaryna alǵan jas ánshi" dep joǵary baǵa berdi. Odan keiingi kezeńderde ataqty «Opera-2» ánin Vitastan 2 ton jońǵary oryndap, búkil qytai halqyn «botadai bozdatty». Onyń jankúierleri kún sanap, saǵat sanap kóbeiip jatty. Ánshini fanattary kúni-túni ańdyp, ol mingen ushaq reisterine bilet satyp alýdy shyǵardy. Ony áýejaidan bir kórip qalýdyń ózin sheksiz baqytqa balaityndar qaptady. Osy sekildi jaǵdailar kóbeigen soń ol qonaqúiin jii-jii aýystyryp otyrýǵa májbúl bolady. Alaida, jankúierlermen kezdese qalǵan jaǵdaida bárine qoltańba úlestirip, sýretke túsip, jyly shyrai tanytýdan qashpaidy. Buryn-sońdy qazaq ánshilerinen osyndai tanymaldylyqqa jetken, osynsha halyqty talantyna tabyndyrǵany bolmaǵan edi. Tipti, álemge tańdai qaqtyrǵan Lara Fabian syndy kúmis kómei ánshiniń ózi qazaqstandyq jas talantpen kezdesýge qumar ekendigin áleýmettik jelide jazdy. Bul tek Dimashtyń ómirindegi emes, tutas qazaq estradasynyń tarihyndaǵy jarqyn sátter edi.
15 sáýir kúni «I am singer» jobasy márege jetip, Dimash Qudaibergen 2-shi oryn aldy. Bul jas ánshi úshin úlken jetistik edi, sebebi kil myqtylar synǵa túsken bul jobanyń talaby da, deńgeii de joǵary bolatyn.
Mine, osylai el dańqyn aspandatqan daýylpaz ánshi, búgingi zamannyń Ámiresi 23 jasqa tolyp jatyr. Halyqtyń súiispenshiligine bólengen ánshige árdaiym aq jol tileimiz!
