Ánshi Dimash Qudaibergen jas ónerpaz Sadraddinniń Almatyda ótken jeke kontsertin joǵary baǵalap, onyń anasy Aigúl Esqaraǵa jyly lebizin bildirdi, dep habarlaidy ult.kz.

Dimash Qudaibergen kontsertten úzindilerdi kórgenin aityp, ónerdegi inisiniń jetistigine qýanǵanyn jetkizgen. Ol Sadraddinniń shyǵarmashylyq joly sátti bolyp, aldaǵy ýaqytta talai biikti baǵyndyrýyna tilektestik bildirdi.

Sondai-aq ánshi Sadraddinniń jetistigine qýanyp otyrǵan anasynyń kóńil kúii ózine de erekshe áser etkenin atap ótken. Dimash Aigúl Esqaranyń balasynyń árbir jetistigine osylai qýanyp, uzaq jyldar boiy súiinip júrýine tilektestik bildirdi.

Óner iesi sheteldegi daiyndyqtaryna bailanysty Almatydaǵy kontsertke qatysa almaǵanyn da túsindirgen. Onyń sózinshe, eger sol kezde elde bolǵanda, Sadraddinge mindetti túrde qoldaý kórsetýge barar edi.

Dimash jas ánshiniń bolashaǵyna úlken senim bildirip, onyń aldaǵy ýaqytta halyqaralyq deńgeige shyǵyp, álemniń iri sahnalarynda óner kórsetip, stadiondarǵa kórermen jinaityn kúnge jetýin tiledi.

Sadraddinniń anasy Aigúl Esqara da Dimash Qudaibergenniń ulyna bildirgen yqylasyna rizashylyǵyn jetkizdi. Ol álemdik sahnada Qazaqstannyń atyn tanytyp júrgen Dimashtyń jyly sózi ózderi úshin erekshe mańyzdy ekenin atap ótken.

Aigúl Esqaranyń aitýynsha, óner adamdarynyń bir-biriniń jetistigine qýanyp, qoldaý kórsetýi mańyzdy. Ol qazaq ónerpazdarynyń óskenin, jetistikke jetkenin qalaitynyn aityp, bireýdiń jolyn kesýge nemese aiaqtan shalýǵa tyrysýdy quptamaitynyn bildirdi.

Sondai-aq ánshiniń anasy Dimashtyń Sadraddinniń shyǵarmashylyǵyna burynnan qoldaý kórsetip kele jatqanyn aitqan. Onyń sózinshe, Dimash árbir qýanyshty sátte jyly yqylasyn bildirip, jas áriptesine únemi qoldaý kórsetedi.

Aita keteiik, Sadraddin Bolattyń Almatydaǵy kontsertinde kigen fýtýristik kostiými áleýmettik jelide qyzý talqyǵa tústi.

Dimash Qudaibergen kim?

Dimash Qudaibergen - qazaqstandyq ánshi, kompozitor jáne mýltiaspapshy. Tolyq aty-jóni — Dinmuhammed Qanatuly Qudaibergen. Ol 1994 jylǵy 24 mamyrda Aqtóbe qalasynda dúniege kelgen. Dimash bala kezinen mýzykamen ainalysyp, kásibi mýzykalyq bilim alǵan.

Ónerpaz keń vokaldyq diapazonymen jáne klassikalyq mýzyka, estrada, rok, halyq mýzykasy sekildi túrli janrlardy biriktire oryndaýymen tanymal. Onyń repertýarynda qazaq tilindegi shyǵarmalarmen qatar birneshe shet tilindegi ánder de bar.

Dimashtyń halyqaralyq deńgeidegi tanymaldyǵy ásirese 2017 jyly Qytaidaǵy «Singer» mýzykalyq jobasyna qatysqannan keiin arta tústi. Keiin ol álemniń túrli elderinde jeke kontsertter ótkizip, Qazaqstan mádenietin halyqaralyq sahnada tanytyp keledi.

2023 jyly Dimash Qudaibergenge Qazaqstannyń Halyq ártisi ataǵy berildi. Al 2024 jyly ol Halyqaralyq kóshi-qon uiymynyń (IOM) Izgi niet elshisi bolyp taǵaiyndaldy.

Dimashtyń ata-anasy da óner salasynyń ókilderi: ákesi — Qanat Aitbaev, anasy — ánshi Svetlana Aitbaeva. Búginde Dimash Qudaibergen álemdik sahnada óner kórsetip júrgen eń tanymal qazaqstandyq oryndaýshylardyń biri.