«Dikii Arman» laqap atymen tanymal Arman Jumageldievtiń Almatynyń tergeý izoliatorynan izim-ǵaiym joǵalyp ketti. Onyń qaida aparylǵany belgisiz. Bul týraly kúdiktiniń advokattary málimdedi, dep habarlaidy ulysmedia.kz.
Advokat Talǵat Esimovtiń aitýynsha, quqyq qorǵaýshylar Jumageldievti kúndiz tergeý izoliatorynan kórgen. Sol ýaqytta kúdikti kýálik berýge daiyn ekenin aitypty.
"Biz áriptesterimizben birge oǵan eki ret bardyq. Bizben birge onyń kamerasyna Bas prokýratýra qurǵan vedomstvoaralyq jedel-tergeý tobynyń músheleri de kirdi. Jaýap alý kezinde Arman Jumageldiev tergeý organdarymen yntymaqtasýǵa daiyn ekenin aitty", — deidi quqyq qorǵaýshy.
Alaida, 1 aqpannan 2 aqpanǵa qaraǵan túni advokattar Dikii Armannyń tergeý izoliatorlarynan shyǵarylǵanyn bildi, olarǵa bul týraly eshkim eskertpegen. Quqyq qorǵaýshylar tergeý organdarymen bailanysqan, olarda da eshqandai aqparat joq bolyp shyqty.
Kúdiktiniń taǵy bir advokaty Qýat Salievtiń aitýynsha, zań boiynsha qorǵaýshylarǵa qaramaǵyndaǵy qorǵalýshynyń kez-kelgen qozǵalysy týraly habarlanýy kerek.
"Bizdiń aqparatymyz boiynsha, Arman Jumageldiev tergeý izoliatorynan áketilgen, biraq qazir onyń qaida ekeni belgisiz", - dep atap ótti Saliev.
Sonymen birge, Jumageldievtiń taǵy bir advokaty Viktor Krivonosov klienttiń ózin-ózi óltirýge nieti joq ekenin atap ótti.
Eske sala keteiik, 7 qańtarda “Dikii Arman” bastaǵan UQT-nyń alty múshesi Almaty PD arnaiy operatsiiasy kezinde ustalǵan bolatyn.
Keiinirek Jumageldievtiń tártipsizdikterdi uiymdastyrdy degen kúdikke ilingeni belgili boldy.
