Belgili ǵalym, L.Gýmilev atyndaǵy Eýraziia ulttyq ýniversitetiniń prorektory, filologiia ǵylymdarynyń doktory, QR UǴA akademigi Dihan Qamzabekuly Abai kúni merekesiniń máni týraly pikir bildirdi, dep habarlaidy QazAqparat.
Elordadaǵy Abai eskertkishine taǵzym etýge jinalǵan ziialy toptyń arasynda belgili ǵalym, ustaz Dihan Qamzabekuly da bolǵan edi. Shara aldynda L.Gýmilev atyndaǵy Eýraziia ulttyq ýniversitetiniń prorektory Abai kúniniń resmi mereke retinde qalai toilanýy kerektigi týraly oiyn aitty.
«Abai – biz úshin rámizdik tulǵa. Abaidyń aty, zaty, murasy ultpen birge jasai beredi. Sondyqtan Úkimet, ar jaǵynda eldiń basshysy, ziialy qaýym Abaiǵa arnaiy kún arnaǵan kezde rýhani turǵyda da, zattyq turǵyda da bereke-birlikke bastaityn kún bolýyn kózdese kerek. «Rýhani jańǵyrý» dep jatamyz ǵoi, Abai arqyly sonyń mánin bilý de bul kúnniń enshisindegi sharýa. Rýhani jańǵyrý degen – jai ǵana bir sharalar nemese esep berý emes, ózimizde bardy uqsata bilý. Óz muramyzǵa bailanysty ózimizdiń ustanymymyz bolǵanda ǵana rýhani jańǵyrǵan bolyp eseptelemiz. Bul urpaq sabaqtastyǵymen, bilimmen keletin dúnie. Biz ádette naýqanshyldyqqa ketip qalamyz. Ondai bolmaýy kerek. Abaidyń «Bes nárseden qashyq bol, bes nársege asyq bol» degen uǵymynyń kontseptsiiasynyń ózi – «Tolyq adam» tulǵasyna, qoǵamdy kemeldikke jumyldyrý», - dedi filologiia ǵylymynyń doktory.
Sondai-aq, ol Abai ilimi arqyly jas býyndy adal urpaq etip tárbieleý qazirgi býyn aldyndaǵy mindet ekenin atady.
«Qoǵam qashan da jaqsylyqqa qarai júredi. Biz qazir álemde, óz ishimizde qandai qiyndyqtar bolsa da, ósetin, ónetin múmkindik izdeýimiz kerek. Sonymen birge ultty jumyldyra otyryp, qoǵamnyń bereke-birligine qyzmet etetin, qoǵamnyń aldaǵy kezeńin anyqtaityn jastardy keshegi adal urpaqtyń jalǵasy etýge kúsh salýymyz kerek. Oǵan jastar da senimdi, jastar da peiildi. Abai sonyń báriniń arasynda altyn kópir bolyp otyr. Abaidyń murasy da, muraty da, onyń altyn arqaýy da osynda. Abai ultpen birge jasaidy. Búgingi kún – ultymyzdyń kúni, rýhani jetistikterimizdiń kúni, rýhani temirqazyq kúnimiz. Ultymyzdy, halqymyzdy osy merekemen quttyqtaimyz. Abaidyń talǵamy, Abaidyń sezimi, Abaidyń júregi, Abaidyń naqyly bizdiń ultty ósirip otyrady», - deidi Dihan Qamzabekuly.
