Foto: Gov.kz
Qazaqstan Digital Bridge 2025 aiasynda birqatar kelisimder jasaý arqyly aqparattyq tehnologiialar men innovatsiialardyń jahandyq qaýymdastyǵyndaǵy eleýli rólin aiqyndai tústi. Forým barysynda memlekettik organdar, iri kompaniialar, halyqaralyq tehnoparkter jáne basqa da uiymdar IT-innovatsiiany damytýǵa baǵyttalǵan 41 qujatqa qol qoidy, dep habarlaidy Ult.kz.
Qazaqstan Respýblikasynyń Jasandy intellekt jáne tsifrlyq damý ministrligi Freedom Bank Kazakhstan, Yandex Qazaqstan, Binance, 3D Global Limited syndy halyqaralyq kompaniialarmen, sondai-aq «Samuryq-Energo» AQ sekildi ulttyq uiymdarmen birqatar memorandýmǵa qol qoidy. Qujattar tsifrlyq qarjyny damytý men infraqurylymdy jańǵyrtýǵa baǵyttalǵan.
Mańyzdy oqiǵalardyń biri – Astana Hub halyqaralyq innovatsiialyq klasteri men robototehnika salasyndaǵy álemdik kóshbasshylardyń biri sanalatyn Qytaidyń UNITREE kompaniiasy arasyndaǵy memorandým boldy. Taraptar Astanada alem.ai jasandy intellekt ortalyǵynyń bazasynda mamandandyrylǵan robototehnika zerthanasyn ashýǵa ýaǵdalasty.
Forým aiasynda taǵy bir mańyzdy qadam – Astana Hub pen álemdik startap-ekojúielerdi taldaityn StartupBlink platformasy arasyndaǵy áriptestik boldy. Qazaqstan tarihta alǵash ret Global Startup Ecosystem Index 2025 reitinginde Ortalyq Aziia elderiniń ishinde birinshi orynǵa shyqty, al Astana Hub – Top Startup Hub in Central Asia mártebesine ie boldy. Qujat startap ekojúiesin birlese damytýǵa, tájiribe almasýǵa jáne qazaqstandyq tehnologiialyq kompaniialardy halyqaralyq deńgeide damytýǵa baǵyttalǵan.
Jalpy, Astana Hub Digital Bridge 2025 aiasynda jeti memorandýmǵa qol qoidy. Olardyń qatarynda Túrkiiadaǵy GEN Türkiye uiymyn basqaratyn jáne álemniń 178 elin qamtityn jahandyq GEN Global kásipkerlik jelisiniń múshesi Habitat Association uiymymen áriptestik týraly kelisim bar. Bul qujat kásipkerlerdi qoldaýǵa, tájiribe almasýǵa jáne Qazaqstan men Túrkiia innovatsiialyq ekojúieleri arasyndaǵy bailanystardy keńeitýge múmkindik beredi.
Sonymen birge Jumabek Ahmetuly Táshenev atyndaǵy ýniversitetpen memorandýmǵa qol qoiylyp, stýdentterdiń Astana Hub ekojúiesine qol jetkizýine, startaptardy qoldaý baǵdarlamalaryna qatysýyna jáne praktikalyq daǵdylaryn damytýyna jol ashyldy.
Sondai-aq Astana Hub rezidenti Biometric.Vision biometriialyq kompaniiasy men inDrive jahandyq qalalyq servis platformasy da seriktestik týraly kelisim jasasty. Yntymaqtastyq inDrive-qa jasandy intellekt pen kompiýterlik kórý tehnologiialaryn engizýge múmkindik beredi. Bul sheshimder paidalanýshylardyń qaýipsizdigin arttyrýǵa ǵana emes, búkil platformanyń innovatsiialyq damýyna serpin bermek.
Eske salaiyq, Digital Bridge 2025 halyqaralyq forýmy 2–4 qazan aralyǵynda Astanada ótýde. Bul – Ortalyq Eýraziiadaǵy tehnologiia jáne jasandy intellekt salasyndaǵy eń aýqymdy is-shara, ol álemdik indýstriia kóshbasshylarynyń, investorlardyń, sarapshylardyń jáne startaptardyń basyn qosty.
Biylǵy forým seriktester men demeýshilerdiń qoldaýynyń arqasynda uiymdastyryldy. Barlyq shyǵyn demeýshilik qarajat esebinen jabyldy.
