«Almaty ákimdigi «Digital Almaty 2021» forýmynda jasandy intellekt qoldanylatyn densaýlyq saqtaý salasyndaǵy eki jobany tanystyrdy, dep habarlaidy QazAqparat.
«Digital Almaty-2021» halyqaralyq forýmynyń kún tártibinde pandemiia kezinde paida bolǵan jańa syn-tegeýrinder men tsifrlyq bastamalar talqylandy.
Almaty qalasynyń tsifrlandyrý basqarmasy 2020 jyly koronavirýs infektsiiasyna qarsy áreket etý úshin 15 jobany iske asyrǵan bolatyn, onyń ekeýi búgingi forýmda tanystyryldy.
Usynylǵan jobalar onokologiialyq aýrýlar men ishemiialyq insýltty aldyn ala diagnostikalaý sekildi kúrdeli baǵyttardaǵy tar sheńberli dáriger mamandarynyń tájiribelik qyzmetinde jasandy intellekttiń qoldanysyn kózdeidi.
«Ǵorus Data» kompaniiasy PACS – radiologiialyq túsirilimderdiń ortalyqtandyrylǵan meditsinalyq arhivin jasaýǵa baǵyttalǵan. Almaty – osy bastamany birinshi bolyp qoldaǵan óńir, qazirgi tańda osy júiemen Qazaqstannyń birneshe qalasy, atap aitqanda Nur-Sultan, Taldyqorǵan, Taraz, Kókshetaý, Óskemen, Atyraý, Pavlodardyń 64 aýrýhanasy jumys isteidi. Qondyrylǵan jasandy intellekttiń arqasynda dáriger shuǵyl qorytyndy shyǵarady.
Jasandy intellekttiń kómegimen kúrdeli aýytqýlar anyqtalǵan túsirilimderge avtomatty túrde joǵary qyzyl belgi qoiylady. Kelesi kezek aýytqýlary az jáne aýytqýlary joq túsirilimderge beriledi.
Jasandy intellekt arqyly óńdelgen túsirilimdi salystyrý úshin tikelei túpnusqa sýretimen birge saqtalady. Anyqtalǵan aýytqýlar boiynsha karta jasalady. Servis ókpe aýrýlarynyń, onyń ishinde pnevmoniia, týberkýlez, isinýdiń (onkologiia) eń jii kezdesetin 14 belgisin anyqtaýǵa qabiletti. Nátijesi avtomatty túrde dárigerdiń qatysýynsyz óńdelip, saqtalady.
Jasandy intellekt kómegimen patsientke sol túsirilim jasalǵan kúni diagnostika jasaýǵa múmkindik beredi. Buǵan deiin nátijieni patsientter 3-ten 14 kúnge deiin kútetin. Qazir PACS 84% diagnostika jasaý dáldigimen kúnine 300-ge jýyq rentgen túsirilimderin óńdeidi.
«Almaty jasandy intellekt zerthanasy» ishemiialyq insýltti erte anyqtaý úshin CEREBRA jobasynda jasandy intellektti paidalanady.
Insýltti medikamentozdy emdeýdiń terapevttik ýaqyty 4,5 saǵatty quraidy, osy ýaqyt aralyǵynda diagnozdy durys qoiyp, emdeý túrin tańdaý qajet. Terapevttik taldaý ýaqyty sheńberinde bas miynyń zaqymdaný dárejesin anyqtap úlgerý múmkin bolsa, der kezinde emdi bastaidy. Kóbinese insýlttiń damý satysyn anyqtaý úshin kopiýterlik tomografiia túsirilimderindegi surǵylt tonnan adam kóziniń ereksheligine bailanysty ondaǵy aiyrmashylyqty anyqtaý múmkin bolmaidy, al jasandy intellekt ony 10 minýtta jasai alady.
Ishemiialyq insýltti anyqtaý úshin jasandy intellekttiń algoritmi eń kúrdeli bolyp esepteletinin atap ótken jón, óitkeni anyqtaýdyń joǵary dárejesine jetkender álemde kóp emes.
Almaty qalasynyń №7-shi qalalyq klinikalyq aýrýhanasynyń bas dárigeri Manas Ramazanov aitýynsha, mamannyń onkologiianyń nemese ishemiialyq insýlttiń bastapqy satysyn anyqtaýǵa jetkilikti saraptamalyq qabileti nemese tájiribesi jetpeýi múmkin.
«Al tsifrlyq tehnologiia birden durys diagnoz qoiyp, patsientti mamandandyrylǵan meditsinalyq mekemege shuǵyl jiberýge kómektesedi. Sondyqtan Qazaqstan boiynsha jasandy intellektti qoldanatyn jobalardyń aýqymyn keńeitý óte mańyzdy», - dedi dáriger.
