Parlament Májilisiniń jalpy otyrysynda depýtattar jastardy baspanamen qamtamasyz etý boiynsha Úkimet basshysynyń orynbasary Eraly Toǵjanovtyń atyna depýtattyq saýal joldady, dep habarlaidy QazAqparat.
«Elbasynyń tapsyrmasyna sáikes ótken Jastar jylynda jumys isteitin jastarǵa 3 myń páter satyp alý quqyǵynsyz jalǵa berilgeni málim. Nur-Sultan, Almaty jáne Shymkent qalalarynda iske asyrylǵan osy baǵdarlama iri megapolisterde eńbek etip júrgen jas otbasylar men jalǵyzbasty jastarymyzdyń baspana máselesin sheshýine ońtaily múmkindik berdi. Sonymen qatar, atalǵan baǵdarlamany aldaǵy ýaqytta júzege asyrý kezinde eskeretin keibir ózekti máselelerge nazar aýdarǵymyz keledi. Birinshiden, Aqparat jáne qoǵamdyq damý ministrliginiń 2019 jylǵy 29 tamyzdaǵy buiryǵymen bekitilgen «Jumys istep júrgen jastarǵa satyp alý quqyǵynsyz jalǵa beriletin turǵynjai berý qaǵidalaryna» sáikes, baǵdarlamaǵa qatysýshydan keminde 40 ailyq eseptik kórsetkish mólsherinde tólem qabilettiligin rastaý talap etiledi. Bul talapty oryndaý biyl qiyndaǵany anyq. Óitkeni, onyń somasy ótken jyly 101 myń teńgeni quraǵan bolsa, ústimizdegi jyly 111 myń teńgeden asty», - dedi depýtat Káribai Musyrman.
Jyl saiyn ailyq eseptik kórsetkishtiń mólsheri arttyrylýyna bailanysty bul soma odan ári óse bermek. Osyǵan orai baǵdarlamaǵa qatysqysy keletin jastardyń tarapynan atalǵan qaǵidalarǵa ózgeris engizip, jas otbasy músheleriniń, iaǵni erli-zaiyptylardyń ekeýiniń jiyntyq tabysyn esepke alý jóninde ótinishter aitylýda.
«Ekinshiden, baǵdarlama boiynsha Eńbek jáne halyqty áleýmettik qorǵaý ministrligi aiqyndaǵan 100 suranysqa ie mamandyǵy bar jastarǵa basymdyq beriledi. Atap aitqanda, sondai mamandyqtardyń birine ie jas jumyskerge 10 ball qosylady. Mundai artyqshylyqqa búgingi tańda óte qajet IT-mamandar, injenerler, sáýletshiler, jobalaýshylar jáne dizainerler ie. Sondai-aq olardyń qataryna betonshylar, sylaqshylar, aǵash ustalary, tas qalaýshylar, santehnikter, slesarlar, traktorshylar, kombainshylar, tiginshiler, elektrshiler, dánekerleýshiler siiaqty mamandyqtardyń ieleri de qosylǵan. Alaida, mundai artyqshylyq qazir qai qala men óńirde bolsyn jetispei otyrǵan jas dárigerler men meiirgerlerge, muǵalimder men oqytýshylarǵa, mádeniet pen sport qyzmetkerlerine, ǵalymdar men jýrnalisterge berilmegen bolyp shyqty», - dedi K. Musyrman.
Osy oraida ol atalǵan baǵdarlama boiynsha basymdyq beriletin 100 suranysqa ie mamandyq tizbesin keńeitip, oǵan densaýlyq saqtaý, bilim berý, mádeniet jáne sport salalarynyń jas mamandaryn, sondai-aq jas ǵalymdar men jýrnalisterdi engizý máselesin qarastyrý qajet ekenin aitty.
«Almaty qalasy ákimdiginiń bastamasymen qolǵa alynǵan «Almaty jastary 3.0» jańa turǵyn úi baǵdarlamasyna qoldaý bildirip, ony basqa qalalar men oblystarda taratý múmkindigin qarastyrǵan jón», - dedi depýtat.
