Qazaqstan halyq partiiasynyń Májilistegi fraktsiiasy respýblikalyq mańyzy bar úsh qalanyń mektepterin karantinge jabýǵa qarsylyq bildirdi, dep habarlaidy Sputnik Qazaqstan.
Fraktsiia ókilderi Premer-ministrdiń atyna depýtattyq saýal joldap, Densaýlyq saqtaý ministrliginiń sheshimine túsinikteme berýdi talap etti.
"Mektepterdiń úzdiksiz jumysy balalardyń bilimi, áleýmettik ómiri men psihologiialyq densaýlyǵy úshin asa qajet. Mektepter eń sońǵy kezekte jabylyp, eń birinshi bolyp ashylýy shart. Bul bilim jáne ǵylym ministrliginiń málimdemesi emes. Ol – Dúniejúzilik densaýlyq saqtaý uiymynyń 2022 jyly 11 qańtarda jasaǵan málimdemesi. Al Bilim jáne ǵylym ministrligi Densaýlyq saqtaý ministrliginiń jeke pikirin qoldap, Úkimettiń nusqaýymen úsh iri qalamyz – Almaty, Nur-Sultan men Shymkenttegi barlyq mektepti jaýyp tastaǵan. Kezekshilik toptardy da qaldyrmady!", - dedi depýtat Irina Smirnova Májilistiń jalpy otyrysynda.
Al basqa aimaqtarda mektepterge jumys isteýge ruqsat berildi. Birqatar shekteýlermen balabaqshalar men qosymsha bilim berý ortalyqtary da ashyldy.
"Poiyzdar men ushaqtar adamǵa lyq toly. Sonda mektepter ǵana infektsiiany taratatyn qaýipti oryndary bolyp otyr. Buǵan deiin epidemiia jaǵdaiynda mektepterdiń jumys jasaý algoritmi sátti synaqtan ótti ǵoi. Ol qaida ketti? Erikti test tapsyrý jáne oń nátije shyqqan jaǵdaida tiisti sharalar (mektepti onlain formatqa aýystyrý) atqarylatyn edi", - dep atap kórsetti Smirnova.
Osy oraida depýtat mańyzdy bir máselege nazar aýdardy. Búginde ata-analar 1-6 synyp oqýshylaryn úide jalǵyz qaldyryp kete almaidy. Al politseiler, dárigerler, órt sóndirýshiler, kólik júrgizýshileri, satýshylar jáne taǵy basqa maman ieleri jumysqa shyǵýǵa tiis.
Qazaqstan halyq partiiasynyń Májilistegi fraktsiiasy úsh qaladaǵy mektepterdiń bárin jabýdyń naqty sebebin jáne osy sheshim qandai kórsetkishterge negizdelgenin túsindirip berýdi talap etti. Depýtattyq saýalǵa I.Smirnova, J. Ahmetbekov, F. Qamenov, G. Qulahmetov, A. Miliýtin, A. Paiaev, S. Reshetnikov, A.Sqakova, E. Smaiylov pen A. Qońyrov qol qoidy.
