Parlament Májilisiniń jalpy otyrysynda depýtattar aýyl mektepterindegi internet jyldamdyǵy máselesin kóterip, Bilim jáne ǵylym ministri Ashat Aimaǵambetovtyń atyna saýal joldady, dep habarlaidy QazAqparat.
«Elde oryn alǵan jaǵdaiǵa bailanysty, distantsiondy bilim máselesi taǵy da ózekti. Depýtattyq saýal «Biryńǵai bilim berýdiń onlain platformasynyń» jumysyna arnalady. Bul «Nur Otan» partiiasynyń Sailaýaldy baǵdarlamasynyń Jol kartasynda qarastyrylǵan. Bilim jáne ǵylym ministrliginiń aqparatyna sáikes, biryńǵai bilim berý platformasyn engizý úshin 5 negizgi bilim berý aqparattyq júiesi anyqtalǵan («Kúndelik» AAJ, «OnlineMektep» AJ, «Mektep.edu» AJ, «Bilimal» AJ, «Daryn Online» AJ). Biryńǵai bilim berý onlain-platformasy 8 myńǵa jýyq mektepte, 3 mln-nan astam oqýshyǵa jáne 300 myń muǵalimge bir ýaqytta oqý protsesiniń qaltqysyz jumysyn qamtamasyz etýi qajet. Alaida, sapaly interneti joq aýyl mektepteri úshin bul platforma qol jetimsiz», - dedi depýtat Juldyz Súleimenova.
Onyń aitýynsha, búgingi tańda 7550 mekteptiń 58-inde múlde internet qosylmaǵan.192 mektepte internet jyldamdyǵynyń tómendigi sonsha, qarapaiym saitty iske qosyp, interaktivti servisti júkteý múmkin emes.
«Budan bólek, atap ótetin basty másele, aýyl jáne qala mektepterindegi internet sapasyna bailanysty bastapqy josparlaý kezeńindegi ministrliktiń normativti qujattarynda ártúrli parametrler belgilengen. Nazar aýdarǵymyz keletindigi, aýyl mektepteri úshin internet jyldamdyǵy qala mektepterine qarǵanda birneshe ese tómen», - dedi depýtat.
Osy rette, kelesi usynystar engizildi:
1) Biryńǵai bilim berý onlain-platformasyna sapaly bilim berý kontentin integratsiialaýdy jáne ádisnamalyq súiemeldeý jumystary jalǵastyrylsyn;
2) Aýyl mektepteri jáne shaǵyn jinaqty mektepter úshin internet sapasyna qoiylatyn talaptar qaita qarastyrylsyn;
3) Tsifrlyq damý ministrligi jáne bailanys operatorlarymen birlesip, jańa baǵdarlamalyq ónimderdiń talaptaryn eskere otyryp, bailanys arnalary men qolda bar jabdyqtardyń múmkindikterin baǵalaý qaita qarastyrylsyn.
4) Pedagogtar men oqýshylardyń bilim berý ortasynda tsifrlyq teńsizdikti tómendetýge bailanysty vedomstvoaralyq keshendi is-jospar ázirlensin.
